मेरो झोला 

साधारण देखिन्छ

तर त्यो कागजका पानाले होइन

पीडितहरुका पीडा, चोट र घाउँले भरिएको छ ।

त्यसमा छन्

एक बलात्कृत पीडितको चिच्याएको मौनता

एक शोषित, हिँसामा रोमालिएको निवेदन

एक वृद्ध आमाले छोराको लोभमा हराएको अधिकार छ।

म यो झोला बोकेर

हरेक दिन अदालत धाउँछु

कहिले गम्भीर आँखाले हेर्छु ईजलासलाई

कहिले चिच्याउन खोज्छु कानुनी दफाको बलमा।

म सरकारी वकील हुँ

तर म सरकारको मात्र होइन

 झोला भित्र रोमालिएका, हरेक घाउँको प्रतिनिधि हुँ।

मसँग कानूनको किताब छ

दफा देखि उपदफा, नियम देखि उपनियम सम्म

तर म उभिएको इजलासको छेउमै

सपना टुटी, न्यायको आशा बोकेको पीडित पनि राखेको छु।

जब म झोलाबाट फाइल खोल्छु

म केवल मुद्दा मात्र कहाँ पढ्छु

म पीडा पढ्छु, आँसु पढ्छु

अनि उत्तरदायित्व सँगै मेरो कर्तव्य बोक्छु।

हो मलाई पनि झोले बन्न मन छ

मेरो झोला हलुका छैन

यो झोला

न्यायको बाटोमा हिँड्नेहरूका लागि हो

यहि झोला भित्र,एक गह्रौं तर पवित्र

स्वार्थ लुकेको कर्तव्य निष्ठा छ

त्यसैले म पनि झोले हुँ, झोले हुँ।।

उपन्यायाधिवक्ता
उच्च सरकारी वकील कार्यालय बुटवल ।