दाम्लाले बाँधेर युवालाई कुटपिट गर्ने वडाअध्यक्ष पक्राउ

सुर्खेत । जाजरकोटको जुनिचाँदे गाउँपालिका- २ का वडाध्यक्ष रामबहादुर नेपालीलाइ प्रहरीले पक्राउ गरेकाे छ । दाम्लाले बाँधेर स्थानीय युवालाई कुटपिट गरेकाे भिडियाे सार्वजनिक भएपछि प्रहरीले पक्राउ गरेकाे हाे ।

साउन १५ गते स्थानीय सर्पे दमाइलाई डोरीले बाँधेर कुटपिट गरेका उनलाई बिहीबार पक्राउ गरिएकाे प्रहरी कार्यालय जाजरकाेटले जनाएकाे छ ।  इलाका प्रहरी कार्यालय पञ्चालाको टोलीले उनलाई घरबाटै नियन्त्रणमा लिएर सदरमुकाम खलंगा झिकाइएको जिल्ला प्रहरी कार्यालय जाजरकोटका प्रहरी निरीक्षक खुमानन्द पाण्डेले जानकारी दिए।

‘वडा अध्यक्षलाई पक्राउ गरेर ल्याइरहेका छौं, उहाँलाई कानून बमोजिम कारबाही हुन्छ, स्थानीयलाई कुटेको भिडियोका आधार र प्रहरी प्रतिवेदन अनुसार मुद्दा चलाउँछौं,’ प्रहरी निरीक्षक पाण्डेले भने ।

पीडितलाई पनि सदरमुकाम बोलाइएको छ । पीडितले अहिलेसम्म जाहेरी दिएका छैनन्। पीडितको बयान, घटनाको प्रकृति र भिडियोलाई आधार मानेर कानुनी कारबाही हुनने प्रहरीले जनाएको छ ।

‘हामीले पीडितलाई जाहेरी दिन आग्रह गरेका छौं, पीडितले जाहेरी नदिए पनि कानून बमोजिम कारबाही हुन्छ,’ उनले भने ।