निर्दलीय व्यवस्थालाई जस्केलाबाट छिराएर देउवा प्रधानमन्त्रीको विश्वास माग्दै : प्रदीप ज्ञवाली (मन्तव्यसहित)

काठमाडौँ । नेकपा एमालेका प्रवक्ता तथा सांसद प्रदीप ज्ञवालीले निर्दलीय व्यवस्थालाई जस्केलाबाट छिराएर शेरबहादुर देउवा प्रधानमन्त्री बनेको आरोप लगाएका छन् । सर्वोच्चको फैसलामा प्रश्न उठाउँदै उनले देउवाले विश्वासको मत मागेको प्रति पनि आपत्ति जनाए ।

प्रदिप ज्ञवाली प्रस्तुत प्रस्तावमाथि भनाइ –

ईतिहास दुईपटक दोहोरिन्छ । कहिले दुखान्तको रुपमा, कहिले प्रहसनको रुपमा । आज कता कता त्यो ईतिहासको स्मरण भएको छ । गृहमन्त्री २०४८ पछि बनेको कांग्रेसको सरकारमा । २०५१ सालमा प्रधानमन्त्री गिरिजाप्रसाद कोइरालाले नीति तथा कार्यक्रममाथि मतदान हुने कार्यक्रममा कांग्रेसकै ३६ सांसद अनुपस्थित भयो ।

र, कांग्रेसको सरकार ढल्यो । त्यसको साक्षी शेरबहादुर देउवा आफै हुनुहुन्थ्यो । दोस्रो सन्दर्भ, २०५२ भदौमा मनमोहन अधिकारीको लोकप्रिय सरकारलाई विस्थापन गरेर प्रधानमन्त्री बन्नु भएको थियो । उहाँले आजजस्तै गरेर विश्वासको मत माग गर्नुभएको थियो । उहाँकै दलका सांसद चक्रबहादुर शाही र दीपकजंग शाह अनुपस्थित भएपछि त्यो सरकार ढल्यो । २०५८ सालमा उहाँ फेरि प्रधानमन्त्री हुनुहुन्थ्यो । संसद्‌मा संकटकाललाई निरन्तरता दिने की नदिने भन्ने विषयमा छलफल चल्दै थियो । आफ्नै पार्टीबाट असहयोग हुन्छ भनेपछि संसद्‌ विघटन गर्नुभएको थियो ।

यो ०५९ को सन्दर्भ हो । चुनाव समयमा हुन सकेन । र समयमा चुनाव हुन नसकेको आरोपमा अक्षमताको प्रमाण भिराएर तत्कालीन राजा ज्ञानेन्द्रले उहाँलाई बर्खास्त गरे । मैले ईतिहासकै सन्दर्भ किन भनिरहेको छु भने नेपालको प्रजातान्त्रिक आन्दोलनको ईतिहासमा दलहरूको विभाजनले सरकार ढलाउने, लोकतन्त्र कमजोर बनाउने, संसदीय व्यवस्थाप्रति वितृष्णा जगाउने एउटा ईतिहास स्थापित भएको छ । मैले प्रहसन किन भनेको हो भने, तीन-तीन पटक दलीय विभाजनको सिकार बनेर बाहिरिनुभएका शेरबहादुर देउवा आज ७६ (५) को अपव्याख्या, ३६ वर्ष अगाडि हामीले समाप्त पारेको निर्दलीय व्यवस्थालाई जस्केलाबाट छिराउने काम गरेको छ । त्यसैको सहारा लिएर प्रधानमन्त्री बन्दै हुनुहुन्छ । मैले यसबेला शुभकामना दिने र समर्थन कसरी गर्ने भन्ने अप्ठ्यारो स्थिति बनेको छ ।

मैले यो विषय आज नेकपा एमाले सरकारबाट बाहिरिनुपर्‍यो भनेर भनिरहेको छैन । कम्युनिष्ट पार्टीको स्थापना २००६ सालमा भएको थियो । ७२ वर्ष हाम्रो पार्टीले पुरा गरेको छ । जसमध्ये ३६ वर्ष हामीले प्रतिद्वन्द्वीका रुपमा बन्देज भएको अवस्थाबाट गुज्रिएर आएका छौँ । कम्युनिष्ट पार्टीलाई नेपाली कांग्रेस सम्मिलित सरकारले समेत प्रतिबन्ध लगाएको थियो । पाँच वर्ष प्रतिबन्धमा राजाविरुद्ध संघर्ष गरेका थियौँ । त्यसैले प्रतिपक्षमा बस्न हामीलाई कुनै गाह्रो छैन ।

प्रश्न को सत्तामा गयो वा गएन भन्ने होइन । प्रश्न ‘फेयर गेम’ भयो कि भएन भन्ने हो । हामीलाई सरकारबाट बाहिरिदै गएकोमा होइन, प्रणाली भत्किरहेको विषयमा छ । प्रधानमन्त्रीबाट हट्नुपर्‍यो भन्ने चिन्ता होइन । लोकप्रिय प्रधानमन्त्री मनमोहन अधिकारी घाइते हुनुहुन्थ्यो । अविश्वासको प्रस्तावमाथि उठेका प्रश्नका जवाफ सदनबाटै जवाफ दिन्छु भन्दा उहाँलाई टिचिङ अस्पतालबाटै दिन लगाइयो । सरकारबाट हटाइएको थियो । 

२०७३ साउनमा प्रधानमन्त्री केपी शर्मा ओलीलाई यसैगरी हटाइएको थियो । दोष यत्ति थियो उहाँले नाकाबन्दीको सामना गर्नुभयो । उहाँले चीनसँग पारवहन सन्धी गर्नुभयो । क्रान्ति पुरा भएपछि विकास र समृद्धिको सपना देख्नुपर्छ भन्नुभयो । नौ महिनाको बीचमा उहाँलाई हटाइयो । हामी सर्लक्क हट्यौँ । ‘कमब्याक’ गरेको विषय सदनलाई जानकारी नै छ ।