प्रदेश सरकारकाे पञ्चवर्षीय योजनाको सिचाई कुलोमा कमसल सामग्री प्रयोग

सुर्खेत । कर्णाली प्रदेश सरकारको निर्माणाधीन सिचाई कुलोमा कमसल सामग्री प्रयोग भएको पाइएको छ । दैलेखको भैरवी गाउँपालिका ५ डोक्रामा निर्माणाधीन कपुरखोला सैन बामनचौर सिचाई कुलोमा कमसल सामग्री भएको पाइएको हो ।

कर्णाली प्रदेश सरकारको प्राथमिकतामा रहेको पञ्चवर्षीय योजना अन्र्तगतको उक्त सिचाई कुलोमा ४० लाख रकम खर्च भैसकेको छ । गत आर्थिक वर्षमा १० लाख रकम खर्च भैसकेको छ भने चालु आर्थिक वर्षमा ३० लाख रकम विनियोजन भई काम संचालन भैरहेको छ ।
सरकारको प्राथमिकतामा रहेको सिचाई कुलोमा कमसल सामग्री प्रयोग हुँदा योजना दिर्घकालिन हुनेमा आशंका गरिएको छ । उक्त सिचाई कुलोको प्राविधिक स्टमेट अनुसार काम नभएर उपभोक्ता र काममा संलग्न मजदुरको मनोमानीमा योजना सुचारु भैरहेको स्थानीयको भनाई छ ।

‘तोकिएको प्राविधिक स्टमेट अनुसार कुनैपनि काम भएको छैन’ स्रोत गोप्य राखिने शर्तमा दुल्लूखबरसँग भने, ‘कुलोमा राखिने सरिया निकै टाढाको दुरीमा राखिएको छ, गिटिको सोलिङ्ग हाल्नुपर्नेमा चुनढुंगा सहितको रातोमाटो हालिएको छ । यतिमात्र होइन सिमेन्टेड मसलामा रोडा र बालुवा प्रयोग गर्नुपर्नेमा उक्त चुनढुंगा सहितको रातोमाटो प्रयोग गरिएको छ ।’

सिचाई कुलोको लागि चार इन्चको दुरीमा सरिया विच्छ्याउनु पर्ने प्राविधिक स्टमेट भएपनि २ फिटकाे दुरीमा राखिएकाे स्थानीयले बताए ।

उक्त सिचाइ कुलाे उपभाेक्ता समितिमार्फत निर्माण गरिएकाे हाे । साेही कुलाेकाे उपभाेक्ता समितिकाे अध्यक्षमा स्थानीय भक्तबहादुर शाही र सचिवमा विष्णु चलाउने रहेका छन् ।

 ‘अख्तियारले सुनुवाई गरेन, ईन्जिनियरकाे अनुगमन भएन’

स्थानीयले सिचाई कुलोमा कमसल सामाग्री प्रयोग भई अनियमितता भएको अख्तियार दुरुपयोग अनुसन्धान आयोगको सुर्खेतस्थित कार्यालयमा उजुरी दिएपनि त्यसको कुनै सुनुवाई नभएको गुनासो स्थानीय उपभोक्ताले गरेका छन् ।

‘महिनादिन अघि यसबारे अख्तियारमा समेत फोनमार्फत उजुरी दर्ता गराएको हो । अहिलेसम्म कुनै कारबाही प्रक्रिया अगाडी बढेको छैन ।’ उजुरीकर्ताले दुल्लूखबरसँग भने, ‘गुणस्तरहीन सामग्री प्रयोग गरेर काम सुचारु भैरहेको छ । यसलाई रोक्ने कसले हो । हामीले अवरोध गर्न सक्दैनौं । अख्तियारको पनि भर लागेन ।’

यस्तै, उक्त सिचाई कुलोको योजना अनुगमनका लागि सम्बन्धित प्राविधिक ईन्जिनियर हालसम्म अनुगमनमा नआएको उनले जानकारी दिए । सिचाइ कुलाेका लागि फिल्ड इन्जिनियरकाे रूपमा कार्यालयबाट इन्जिनियर पदम थापालाई खटाइएकाे छ । यद्यपी खानेपानी सिचाई तथा उर्जा विकास कार्यालयले भने आफुहरु अनुगमनमा गईरहेको दावी गरेको छ ।

पत्राचार गरी कारबाही गर्छौं : कार्यालय प्रमुख गौतम

सिचाई कुलोमा कमसल सामग्रीको प्रयोग भएको पाइएमा अनुगमन गरी उपभोक्ता समितिलाई कारबाही गरिने खानेपानी सिचाइ तथा उर्जा विकास कार्यालय दैलेखको प्रमुख अशोक गौतमले दुल्लूखबरलाई जानकारी दिए ।

‘पहिलो चरणमा उपभोक्ता समितिलाई पत्राचार गर्छौं । यदि त्यसो भएको पाइएमा मुल्यांकन गरी सोही बमोजिमको रकम भुक्तानी गर्छौं ।’

कार्यालयबाट उक्त सिचाई कुलोका लागि १५ लाख रकम भुक्तानी गरिसकिएको कार्यालयले जनाएकाे छ ।

सम्पादित भिडियाे हेर्नुहाेस् :