![यस्तो छ सरकारको नीति तथा कार्यक्रम [पूर्णपाठ]](https://dullukhabar.com/wp-content/uploads/2022/05/president-696x392-1-360x180.jpg)
दुल्लू । दैलेखको दुल्लू नगरपालिका–४ स्थित मौरीकोट विद्यालयको वार्षिकोत्सव सम्पन्न भएको छ । विद्यालयले एक औपचारिक कार्यक्रमकाबीच ३९ औं वार्षिकोत्सव सम्पन्न गरेको हो ।
कार्यक्रमको प्रमुख अथितिको रुपमा बोल्दै दुल्लू नगरपालिका वडा नं.३ का वडाअध्यक्ष कलम बहादुर खनालले मौरीकोट विद्यालय ऐतिहासिक भएको भन्दै ईतिहाँसलाई ढाकछोप गर्न नहुने बताएका छन् । कार्यक्रमका वक्ताहरुले आफुले र आफ्ना पुर्खाहरुले विद्यालय स्थापनाकालमा गरेका योगदानलाई पछिल्लो समय ओझेलमा पार्ने कार्य भैरहेको भन्दै आपत्ति जनाएपछि सोको जवाफस्वरुप खनालले यस्तो बताएका हुन् ।
उनले दुल्लूमा अवस्थित बाघढुंगाको कथा स्मरण गर्दै भने – दुल्लूमा बाघढुंगाको साथमा एउटा बघेनी ढुंगापनि रहेको र उक्त बघेनी ढुंगाले राजदरबारलाई पिडादिने भएकाले उक्त ढुंगालाई माटो हालेर पुर्ने गरिएको थियो त्यसरी नै पछिल्लो परिवर्तनपछि विगतको ईतिहाँसलाई बिर्सने र आफ्नो योगदानको मात्रै गुणगान गाउने संस्कारको विकास भैरहेको अवस्था रहेको तितो सत्य उल्लेख गरे ।
शैक्षिक गुणस्तर कायम नरहेको भनेर अधिकांशले उठाएको प्रश्नमा उनले विद्यालयहरुलाई राजनीतिक किल्लाको रुपमा विकास गरिने परिपाटिले कुनैपनि शिक्षकले विद्यार्थी र विद्यालय व्यवस्थापन समितिको डर नमान्ने अवस्था आएको बताए ।
२०४६ सालको परिवर्तनपछिको राजनितिक संस्कारले दलको व्यक्तिहरु विद्यालयमा भर्तिहुने र विद्यार्थीको पढाईप्रति भन्दापनि आफ्ना व्यक्तिगत काम र राजनितीक दलहरुका कार्यक्रममा अधिकांश समय बिताउने भएकाले गुणस्तर कायम हुन नसकेको उनको भनाई छ ।
प्रधानाध्यापक टंक कार्कीले संचालन गर्नुभएको उक्त कार्यक्रममा प्रमुख अतिथि कलम बहादुर खनाल, अतिथिहरु दुल्लू नगरपालिका वडा नं.४ का वडाअध्यक्ष भरत प्रसाद उपाध्याय, संस्थापक अध्यक्ष अविचन्द्र नेपाल, विद्यालयका संस्थापक प्रधानाध्यापक ज्वाला प्रसाद खनाल, छिमेकी विद्यालयका प्रधानाध्यापकहरु जनक बहादुर कार्की, छविलाल कार्की, पूर्ण बहादुर कार्की, खगेन्द्र कुमार महत, विद्यालयका पूर्व प्रधानाध्यापकहरु सारदा कार्की, डम्वर खनाल, दुल्लू नगरपालिकाका कानूनी सल्लाहकार खगेन्द्र खनाल, विजया माध्यामिक विद्यालयका प्रधानाध्यापक केशव बहादुर भण्डारी,विद्यालयका पूर्व वि.व्य.स.अध्यक्षहरु, स्थानीय राजनीतिक दलका प्रतिनिधीहरु, विद्यालयका पूर्व विद्यार्थीहरु, विद्यार्थीहरु, अभिभावक लगायतको बाक्लो उपस्थिति रहेको थियो ।
