बिना कारण पत्रकार रावलमाथि चार घण्टासम्म सुर्खेत प्रहरीको यातना

सुर्खेत । सुर्खेतमा कार्यरत पत्रकार रमेश रावललाई बिना कारण प्रहरीले चारघण्टासम्म यातना दिएको छ ।

काँक्रेविहार दैनिक, नयाँपत्रिका दैनिक र शिलापत्र डटकममा कार्यरत पत्रकार रावल कार्यालयको काम सकेर निवास फर्किने क्रममा प्रहरीले बिना कारण नियन्त्रणमा लिई यातना दिएको हो ।

गोदामलाइनस्थित काँक्रेविहार दैनिकको कार्यालयबाट काम सकेर यरिचौकस्थित निवासमा फर्किने क्रममा मंगलबार राती साढे १० बजेदेखि विहान दुई बजेसम्म यरिचौक प्रहरी विटमा डिउटी खटिएका सिपाहीले ‘प्रहरी विट’भित्र थुनामा राखी कुटपिट गरेको पीडित रावलले बताए ।

‘निवास जानेक्रममा मलाई प्रहरीतर्फ बोलाएर गुण्डाशैलीमा थर्काए । म कामबाट फर्किएर घर जान लागेको हुँ भन्दापनि बढि बोल्छस् भन्दै कुटपिट गरे’ पीडित रावलले भने, ‘खानतलासी गरेर मसँग भएको मोबाइल, पर्स, परिचयपत्र लिई । प्रहरी विटभित्र थुनामा राखियोे ।’
आफुलाई थुनामा राख्नुको कारण सोध्दा–‘रातीमा किन हिडेको तेरो पक्राउ पुर्जी आउदै छ भन्दै नगरप्रहरीको गाडी बोलाइयो ।’

‘हवल्दारको कमाण्डमा आएको गाडी टोलीले ममाथी थप कुटपिट गरि गाडिमा बसाल्यो । प्रहरीसँग पत्रकार दिपक अधिकारीले टेलिफोन कुराकानी गरेपछि मलाई त्यही छोडेर गाडी फर्कियो ।’ उनले भने, ‘मेरो मोबाइल र पर्स फिर्ता दिएर अलपत्र छाडियो ।’

प्रहरीले रातीमा एक्लै हिडिरहेका पत्रकार रावललाई मापसे गरेको भन्दै नियन्त्रणमा लिएको बताएको छ । यद्यपी प्रहरीले मापसे चेकजाँच गरेको प्रमाण भने राखेको छैन जसले गर्दा प्रहरीले बिना कारण नियन्त्रणमा लिई यातना दिएको प्रष्ट हुन्छ ।

वीरेन्द्रनगरमा चोरीका घटना बढ्दै आएकोले रातीमा एक्लै हिडेको देखेपछि सोधपुछ गर्न बोलाईएको तर यातना नदिएको नगर प्रहरी कार्यालयका प्रहरी निरीक्षक नेत्र बुढाले बताए । यद्यपी सोधपुछ गर्न बोलाइएका रावललाई ४ घण्टासम्म प्रहरी नियन्त्रणमा लिनुले थप रहस्यमय देखिएको छ ।

पत्रकार महासंघद्वारा कारबाहीको माग

पत्रकार  रावलमाथि मंगलबार राती प्रहरीले गरेको दुव्र्यहार कुटपिट घटनाप्रति भएको नेपाल पत्रकार महासंघ कर्णाली प्रदेशले ध्यानआकर्षण भएको जनाएको छ ।

बुधबार महासंघका कर्णाली प्रदेश महासचिव दीपेन्द्र शर्माले जारी गर्दै ध्यानआकर्षण भएको जनाएको हो ।
‘स्थानीय पत्रिकाको काम सकेर निवासतर्फ जादै गरेका गर्दा सुर्खेत वीरेन्द्रनगरको यरीचोकमा डिउटीमा रहेका प्रहरीले गरेको दुव्र्यहारको घटना प्रति महासंघ प्रदेश समितिको गम्भीर ध्यानआकर्षण भएको छ ।’

विज्ञप्तीमा भनिएको छ,‘आफ्नो नियमित काम सकेर निवासतर्फ पत्रकार रावलप्रति गरिएको यस प्रकारको दुव्र्यहारको कडा रुपमा बिरोध गर्दछ ।’
स्वतन्त्रतापूर्वक हिडडुल गर्न पाउने नागरिकको मौलिक हकको सम्मान गर्न समेत महासंघ माग समेत गरेको छ ।

महासंघले यस्ता प्रकारका घटनाले पत्रकारलाई थप असुरक्षित बनाउनुका साथै प्रेस स्वतन्त्रतामाथिको धावा बोलेको आफ्नो ठहर रहेको विज्ञप्तीमा भनेको छ ।
‘कुनै पक्षबाट यस्ता उच्छृखल र गैरकानुनी कार्य निन्दनीय भएको भन्दै पत्रकारमाथि गरिएका यस्ता हर्कत बन्द गर्न माग गरेको छ ।
स्वतन्त्र, निर्भयका साथ पत्रकारिता गर्ने वातावरण मिलाउन दोषी उपर कानुनी कारवाहीको लागि सम्बन्धित पक्षसँग माग समेत गरेको छ।