रुकुम पश्चिम । रुकुम पश्चिममा नेकपा (दाहाल–नेपाल समूह) र नेपाली कांग्रेसका कार्यकर्ताबीच झडप हुँदा वडाध्यक्षसहित चारजना घाइते भएका छन् ।
आठविसकोट नगरपालिका–९ राडीमा भएको झडपमा वडाध्यक्ष तारकबहादुर शाही, कांग्रेस कार्यकर्ता तेजबिक्रम आरसी, दिपक केसी र प्रकाश शाही घाइते भएका हुन् ।
नेकपा (दाहाल–नेपाल समूह)का कार्यकर्ता एवं नगरपालिका वडानम्बर– ३ का वडाध्यक्ष केशरमान विक उनका भाई गोपाल विक र वडानम्बर –८ का वडाध्यक्ष मानबहादुर चनाराको नेतृत्वमा रहेका नेकपाका कार्यकर्ताले कांग्रेसका कार्यकर्तालाई आक्रमण गरेको नेपाली कांग्रेस रुकुम पश्चिमका उपसभापति धिरेन्द्र बटालाले जानकारी दिए ।
केही दिनअघि नेकपाका कार्यकर्तालाई कांग्रेसले आफ्नो पार्टीमा प्रवेश गराएको विषयमा विवाद हुँदा सोमबार राति दुई पक्षबीच विवाद सिर्जना भएको थियो । उक्त, विवाद समाधानका लागि मंगलबार (आज) बिहान ईलाका प्रहरी कार्यालय राडीमा छलफल भइरहँदा वडाध्यक्ष शाही लगायतका कांग्रेस कार्यकर्ता माथि आक्रमण गरेको प्रहरीले जनाएको छ।
स्थिति उग्र बन्दै गएपछि प्रहरीले हवाई फाएर समेत गरेको छ ।दुई पक्षबीच सहमतिका लागि छलफल भैइरहेको अवस्थामा वडाध्यक्ष शाहीमाथि एक्कासी हातपात गरेपछि स्थिती उग्र बनेको हो ।
अहिले (दिउँसो १ बजे)सम्म पनि दुवै पक्षले ढुंगामुडा गरिरहेका छन् । झडप नियन्त्रण हुन नसकेको प्रहरीले जनाएको छ ।
झडप उग्र बन्दै गएपछि जिल्ला प्रहरी कार्यालयबाट प्रहरी निरीक्षक कपिल शाहीको नेतृत्वमा थप टोली पठाइएको जिल्ला प्रहरी कार्यालय रुकुम पश्चिमका प्रमुख डिएसपी ध्रव बहादुर श्रेष्ठले बताए ।
प्रहरीले ३ नम्बर वडाध्यक्ष केशरमानव विक, भाई गोपाल विक र ८ नम्बर मानबहादुर चनारालाई नियन्त्रणमा लिएको छ ।
गत कात्तिकमा नेपाली कांग्रेसले जिल्ला समन्वय समितिका सदस्य अमृत बोहरालगायका दुई सय नेकपाका कार्यकर्तालाई प्रवेश गराएको थियो ।
त्यसपछि कांग्रेसले ३ नम्बर वडामा पार्टीको कार्यक्रम गर्दा वडाध्यक्ष केशरमानकै नेतृत्वमा कांग्रेसलाई कार्यक्रम गर्न नदिने भन्दै नेकपाका कार्यकर्तालाई नाराबाजी गरेका थिए ।
वडाध्यक्ष केशरमान र मानबहादुर यसअघि पनि पटक पटक विवादमा आउने गरेका छन् ।
