सुर्खेत । भारतको महाराष्ट्रमा भएको पावर लिफ्टिङ मा दुई स्वर्ण पदक जित्न सफल सुर्खेतकी चेली श्रुति कार्कीलाई सुर्खेत उद्योग वाणिज्य संघले नगत सहित सम्मान गरेको छ ।
संघले आज एक कार्यक्रमको आयोजना गरेर कार्कीलाई नगत दशहजार सहित सम्मान गरेको हो।
खेलुकुदको माध्यबाट नेपालको प्रतिनिधित्व गर्दै अन्तराष्ट्रिय स्तरमा नेपालको नाम चिनाउन सफल भएको भन्दै सम्मान गरिएको उद्योग वाणिज्य संघले जनाएको छ।
कार्यक्रममा उद्योग बाणिज्य संघका वाणिज्य उपाध्यक्ष दिपेन्द्र ढकालले खेलका माध्यमबाट कर्णालीको नाम उच्च राख्नेकार्य गरेकाले खेलाडी कार्कीलाई सम्मान गरेको बताए ।
उनले भने,‘ आर्थिक रुपमा खेलबाट व्यवसायिकता झल्काउन अझै बाँकी रहेको छ । जसका लागि नीजि क्षेत्रबाट सहयोग गर्न हामी तयार छौँ ।’
कार्यक्रममा कर्णाली प्रदेश खेलकुद परिषका उपाध्यक्ष प्रमोद हमालले खेलक्षेत्रलाई व्यवसायीकरण गर्न जरुरी रहेको जनाए ।
उनले नीजिक्षेत्रले पनि खेलाडीलाई ब्यवसायिक बनाउनतर्फ लागे यसले सिगों व्यवसायी क्षेत्रमा पनि फाईदा हुने बताए ।
नीजिक्षेत्रले खेल क्षेत्रमा लगानी गरे विभिन्न क्षेत्रबाट कर्णालीमा धेरै खेलाडी आउने र यहाँको व्यापार,व्यवसायको प्रबर्धन हुने उनको भनाई छ।
