काठमाडौं । नेपालमा चालू आर्थिक वर्षमा धानको उत्पादन गतवर्षको तुलनामा करीब ७१ हजार मेट्रिकटनले वृद्धि भएको छ । कृषि तथा पशुपन्छी विकास मन्त्रालयले सोमवार विज्ञप्ति जारी गर्दै यस वर्षको धान उत्पादन बढेको जानकारी दिएको हो ।
मन्त्रालयले सार्वजनिक गरेको तथ्यांकअनुसार गतवर्षको तुलनामा यस वर्ष चैतेधान र वर्षेधान दुवै गरी ७० हजार ८ सय ३१ मेट्रिकटन वृद्धि भएको हो ।
यस वर्ष नेपालमा कुल धान उत्पादन परिमाण ५६ लाख २१ हजार ७ सय १० मेट्रिक टन पुगेको छ । गतवर्ष नेपालमा ५५ लाख ५० हजार ८ सय ७९ मेट्रिकटन धान उत्पादन भएको थियो । यस वर्ष बन्दाबन्दीका कारण कामदारको सहज उपलब्धता, लगातारको सक्रिय मनसुन र बिउबिजन उपलब्धतामा सहजीकरण आदि कारणले धान उत्पादन बढेको बताइएको छ ।
विज्ञप्तिअनुसार यस वर्षको उत्पादकत्व ३ दशमलव ८२ पुगेको छ, जुन गतवर्षको भन्दा शून्य दशमलव २८ प्रतिशत बढी हो । यो उत्पादकत्व हाल सम्मकै उच्च हो ।
चालू आर्थिक वर्षमा चैते र वर्षे गरी कुल १४ लाख ७३ हजार ४ सय ७४ हेक्टर जमीनमा धानखेती गरिएको थियो । जुन गतवर्षको भन्दा करीब १५ हजार हेक्टर बढी हो । मन्त्रालयले विगतका ५ वर्षमा नेपालमा भएको धान उत्पादनको विश्लेषण गर्दै आर्थिक वर्ष २०७३÷७४ का तुलनामा यस वर्षको उत्पादन ७ दशमलव ४८ प्रतिशतले वृद्धि भएको बताएको छ ।
धानको उत्पादन अझै बढ्न सक्ने अनुमान गरिएको भए पनि मल हाल्ने समयमा युरिया मलको अभाव हुन गएकाले सोचेजस्तो उत्पादन हुन नसकेको पनि मन्त्रालयले ठहर गरेको मन्त्रालयका प्रवक्ता डा. श्रीराम घिमेरेले जानकारी दिए ।
