सुर्खेत । कर्णाली प्रदेशका किसानले अब दुई प्रतिशत ब्याजदरमा एक करोडसम्म ऋण पाउन भएका छन् ।
मंगलबार भूमी व्यवस्था, कृषि तथा सहकारी मन्त्रालयले कृषि विकास बैंकसँग ब्याज अनुदान कार्यक्रम सञ्चालनका लागि समझदारी पत्रमा हस्ताक्षर गरेको हो ।
हस्ताक्षर सँगै प्रदेश सरकारको उक्त, निर्णय कार्यान्वयनमा आएको हो । प्रदेश सरकारले अब कृषि विकास बैँकमार्फत कृषकलाई वार्षिक दुई प्रतिशत ब्याजदरमा ऋण उपलब्ध गराउने व्यवस्था गरेको हो ।
व्यवसायिक कृषि तथा पशुपालन व्यवसायको प्रवर्द्धन, कृषकहरूको रोजगारी वृद्धि र जीवनस्तर उकास्ने उद्देश्यले प्रदेश सरकारले ल्याएको ब्याज अनुदान कार्यक्रममार्फत कृषकले अब दुई प्रतिशत ब्याजदरमा ऋण पाउने छन्,’ भुमी, व्यवस्था, कृषि तथा सहकारी मन्त्री विमला केसीले भनिन् ,‘अहिले कृषि विकास बैंकले ९ प्रतिशतमा कृषि कर्जा प्रवाह गरेको छ।’
त्यसमा प्रदेश सरकारले सात प्रतिशत अनुदान दिने र कृषक आफैले दुई प्रतिशत तिर्नुपर्ने मन्त्री केसीले बताईन् । यो ऋण किसानले पाँच वर्षसम्मका लागि पाउने छन् ।
मन्त्री केसीका अनुसार मन्त्रालयले ब्याज अनुदान कार्यक्रमका लागि चालु आर्थिक वर्षमा ७ करोड रुपैयाँ बजेटको व्यवस्था गरेको छ ।
कर्णाली प्रदेशमा रहेका क, ख, ग र घ वर्गका बैंक तथा वित्तीय संस्थाहरुमार्फत कृषकहरूले ऋण पाउने भनिएको थियो ।
यद्यपी अरु बैंकले सम्झौता नगरेपछि कृषि विकास बैंकसँग सम्झौता गरिएको केसीको भनाई छ ।
बैंकमा धितो राख्न नसक्ने कृषकहरूका लागि सरकार नै जमानी बसिदिएर ऋण उपलब्ध गराउन पनि सकिने छ,’ मन्त्री केसीले भनिन् ,‘ साना कृषकहरूलाई समेट्ने गरी सहुलियत कर्जा प्रवाहका लागि कानुन बनाउँदै छौँ।’ त्यसपछि सहकारीमार्फत प्रवाह गर्ने गरी छलफल भइरहेको छ ।
कृषि विकास बैंकका उपमहाप्रबन्धक प्रताप सुवेदीले बढीभन्दा बढी कृषकलाई समेट्ने गरी कार्यक्रमलाई प्रभावकारी बनाइने दावी गरे ।
उनले भने ,‘ सम्झौताअनुसार बैंकले कर्जा प्रवाह गरिने छ ।’
साथै कर्णाली प्रदेशमा रहेका १८ वटा शाखामार्फत सरकारले दिएको ब्याज अनुदानमा ऋण लिन सकिने सुवेदीले बताए ।
