सुर्खेत । सुर्खेतको वीरेन्द्रनगर नगरपालिका ९ लाटिकोइलीस्थित प्रसिद्ध धार्मिक स्थल शिव मन्दिरमा २१ फिट अग्लो अर्धनारेश्वरको मूर्ति स्थापना गरिएको छ । आज घटस्थापनाको अवसर पारेर उक्त मुर्ति स्थापना गरिएको हो । 
फाउण्डेसन (मुर्ति राख्न बनाइको ठाउँ) ३० फिट र २१ फिटको मुर्तिसहित जम्मा ५१ फिट उचाई रहेको छ । सो अर्धनारेश्वरको मुर्ति नेपालकै अग्लो भएको वडाअध्यक्ष सुरेश मानन्धरको दावी छ ।
धार्मिक पर्यटनको विकास तथा मन्दिरको स्तरोन्नतिका लागि २०७५ साल साउन महिनामा उक्त मन्दिरमा महापुराँण (सप्ताह पुराँण) आयोजना गरिएको थियो । सोही महापुराँणमा संकलन भएको दान (सहयोग)बाट मुर्ति निर्माण गरिएको वडाअध्यक्ष मानन्धरले जानकारी दिए । उनका अनुसार महापुराँणबाट उठेको एक करोड सात लाख २९ हजार नौं सय रुपैयाँमध्ये ३६ लाख रकम खर्च गरी मुर्ति निर्माण गरिएको हो ।
ऐतिहासिक किम्वदंन्ती बोकेको शिव मन्दिरमा स्थानीय दानवीरदाताको सहयोगबाट पुर्ननिर्माण गरेको अध्यक्ष मानन्धरको भनाई छ ।
‘किम्वदन्तीका अनुसार ४ सय वर्ष पुरानो शिव मन्दिरमा कान नसुन्ने र बोल्न नसक्नेहरुले पूजा–आजा गरी भाकल राखेमा बोल्न र सुन्न सक्ने जनविश्वास रहेको छ’ उनले भने, ‘एउटै ढुंगाबाट मन्दिर स्थापना भएकोले अर्धनारेश्वरीको मुर्ति पनि एउटै ढुंगाबाट निर्माण गरिएको हो ।’
मुर्ति निर्माण गरिएकाे साे ढुंगा काँक्रविहार संरक्षित क्षेत्रबाट ल्याइएकाे हाे ।
शिव भूमिका नामले पहिचान गर्न मिल्ने लाटिकोइली क्षेत्रमा शिव मन्दिर, शिवले नै विहार गरेको क्षेत्र काँक्रेबिहार, अँधेरी गुफा लगायतका स्थानले समग्र वीरेन्द्रनगरको धार्मिक पर्यटकीय स्थलको रुपमा परिचित गराएको वडाध्यक्ष मानन्धरको भनाई छ ।
मन्दिरमा भेटिएको शिलालेख अनुसार साके संवत १५०४ र ई.पू. १६३९ मा स्थापना भएको शिव मन्दिरको स्थापना भएको हो ।
