ग्राभेल सडक हिलाम्मे कसरी ?

दैलेख । कर्णाली राजमार्गबाट ठाटीकाँध गाउँपालिका जोड्ने चिने–ठाटीकाँध –बिजारे सडक ग्राभेल गरिएको छ । ग्राभेल सडकमा ढुंगा विछ्याइएको हुन्छ जसको कारण हिलाम्मे हुदैन । तर उक्त सडक भने सामान्य वर्षातमा पनि हिलाम्मे बन्छ । जसको कारण मान्छे हिड्नसमेत मुस्किल परेको स्थानीयको भनाई छ ।

सडकमा ढुंगाविछ्याउनुको साटो निर्माण व्यवसायी र प्राविधिकले अनियमितता गरी माटोसहितको ढुंगा विछ्याउँदा हिलाम्मे सडक भएको स्थानीयको आरोप छ ।

‘केही ठाउँमा मात्रै ग्राभेल बिछ्याएर रकम सक्ने काम भयो, ’स्थानीय बिर्खबहादुर शाहीले भने, ‘पानी परेको बेला सडकमा मान्छे हिँड्नसमेत मुस्किल हुन्छ ।’ प्राविधिक स्टमेट मिलाएर सडकमा अनियमितता गरिएको उनले आरोप लगाए ।

गुणस्तरहीन ग्राभेल गरी उपभोक्ता समिति र ठेकेदारले रकम सिध्याएको स्थानीय कमल शाहीले बताए । उनका अनुसार सडकमा जथाभावी छरिएको ढुंगा र गिट्टी उप्किसकेका छन् । ‘सबै ग्राभेल माटोमा मिसियो,’ उनले भने, ‘स्तरोन्नति गरिएको सडकमा साना गाडी चलाउन पनि मुस्किल छ ।’ उनका अनुसार गाउँपालिकाले भने १५ सय मिटर ग्राभेल गरिएको दाबी गरेको छ ।

७४ लाख रुपैयाँ विनियोजन गरिएको योजना उपभोक्ता समितिले निर्माण गर्न नसकेपछि ठेकेदारलाई जिम्मा लगाएको थियो ।
सडक ग्राभेलको जिम्मा विजय कन्स्ट्रक्सन, सुर्खेतले पाएको थियो । सडक स्तरोन्नतिका लागि सुरुमा ५० लाख रुपैयाँ विनियोजन गरी उपभोक्ता समितिलाई जिम्मा दिए पनि नसकेपछि ठेकेदारमार्फत गराउन थप २४ लाख रुपैयाँ थप गरिएको गाउँपालिकाले जनाएको छ ।
गाउँपालिकाले ५ लाख रुपैयाँको काम बाँकी भएको भन्दै ठेकेदारलाई ६९ लाख रुपैयाँ भुक्तानी दिएको छ ।

बजेट फ्रिज जाने भएपछि असार मसान्तमा ठेकेदारमार्फत हतारहतार काम गराइएको उपभोक्ता समितिका सचिव मानबहादुर विष्टले बताए । उनका अनुसार समितिमा खर्च भएको ७४ हजार रुपैयाँ राखेर बाँकी रकम ठेकेदारलाई दिइएको हो ।
‘समितिसँग स्रोत–साधन नभएकाले ठेकेदारलाई काम दिएका हौं,’ उनले भने, ‘समितिले पाउने पुरै रकमसमेत पाएको छैन ।’ गाउँपालिकाका सवइन्जिनियर लबबहादुर सिजापतिले स्टमेटअनुसार काम भएको दाबी गरे ।
इन्जिनियरले प्राविधिक स्टमेटअनुसार काम भएको प्रतिवेदन पेश गरेपछि ठेकेदारलाई भुक्तानी दिइएको गाउँपालिकाका प्रमुख प्रशासकीय अधिकृत बावुराम नेपालीले बताए । सडकमा सम्झौता अनुसार काम भएको गाउँपालिका अध्यक्ष धीरबहादुर शाहीकाे दाबी छ ।

‘योजनाबाट ५० लाख बचाएर घर र कार किनेँ’

सडकको स्तरोन्नतिमा अनियमितता भएको ठेकेदार उपेन्द्र बोहोराको स्वीकारोक्ती छ । ‘योजनाबाट ५० लाख बचाएर घर र कार किनेँ, ’ उनले भने, ‘ग्राभेल १५ लाखको पनि भएको छैन, केही रकम उपभोक्ता समितिका पदाधिकारीलाई वितरण गरियो ।’ रकम नपाएका केही व्यक्तिले आफ्नो विरोध गरेको उनको दाबी छ ।