मिश्रले पिरामिड पस्कनुअघि

चीनले ग्रेटवाल देखाउनुअघि

भेनिसले सहर बसाउनुअघि

पेरिसले आइफल चढाउनुअघि

तिनकै गहिरो मायामा थिएँ म

छुट्नै नमिल्ने छायाँमा थिएँ म

 

हार्वर्डले सिलेबस् बनाउनुअघि

जुकरबर्गले फेसबुक चलाउनुअघि

सिङ्गापुरको समृद्धि चुलिनुअघि

बुर्जखलिफा अग्लिनुअघि

तिनकै गहिरो मायामा थिएँ म

छुट्नै नमिल्ने छायाँमा थिएँ म

 

ए,भीरपाखामा गीत गाउनेहरू हो

पाटनमा भेँडा चराउनेहरू हो

मन्दिर र मस्जिद धाउनेहरू हो

ढुङ्गालाई फूल चढाउनेहरू हो

पराधीनतामा रमाउनेहरू हो

तिम्रा पनि अठोट छन् र ?

आँखाहरूमा सपना छन् र?

 

सम्भावनामा खोज मलाई

गहिरा आँखाले रोज मलाई

उद्देश्यहरूमा सोँच मलाई

पाखुरीहरूले घोँच मलाई

यिनकै गहिरो मायामा हुन्छु म

छुट्नै नमिल्ने छायाँमा हुन्छु म

 

आऊ, एकपल्ट अँगालो हालौँ

झुपडीतिर ढल्किनेलाई सलाम

मैनसरि पग्लिनेलाई सलाम

बाजुहरूले हल्किनेलाई सलाम

हिमालसरि अग्लिनेलाई सलाम

सपना देख्नेहरूलाई सलाम ।

(लेखक मध्यपश्चिमाञ्चल विश्वविद्यालयका पूर्व रजिष्टार हुनुहुन्छ)