सल्यानमा श्रममा आधारित खाद्यान्न कार्यक्रम

सल्यान ।  लकडाउन केही खुकुलो भए पनि दैनिक ज्याला मजदूरी गरेर छाक टार्ने परिवारहरु अझै मार परी रहेका छन्।  बन्दाबन्दीकै कारण दैनिक काम गरेर खानेहरू बिहान बेलुकाको छाक टार्न अब सरकारकै भर पर्नु पर्ने अवस्था आएको छ। धेरै स्थानीय तहहरुले राहत वितरण पनि गर्दै आइरहेका छन्। तर सल्यानको एक गाउँपालिकाले भने नयाँ अभ्यासको थालनी गरेको छ। जिल्लाको दार्मा गाउँपालिकाले श्रममा आधारित खाद्यन्न कार्यक्रम गरेर नयाँ अभ्यास थालेको हो।

विपन्न परिवारका एक सदस्यलाई श्रममा लगाएर राहत वितरणको अभ्यास थालिएको गाउँपालिका अध्यक्ष नीम बहादुर केसी अरुणले बताए। राहत प्याकेजले मानिसलाई अल्छी बनाउने र सधैं अर्काको भर पर्ने बानीको विकास हुने भएकाले पालिका भित्रका गरिब तथा विपन्न र दैनिक ज्याला मजदुरीमा आश्रित परिवारका एक सदस्यलाई श्रममा आधारित रोजगार कार्यक्रम सुरु गरेको उनको भनाइ छ।  उनले भने ‘लक्षित समुदायलाई राहत वितरण गर्दा परनिर्भरता बढाउने सम्भावना देखेपछि रोजगार स्वरुप श्रममा आधारित रोजगार कार्यक्रम सञ्चालन गरेका हौँ।’  काम गर्ने व्यक्ति वडाबाटै छनोट गरी वडाकै सार्वजनिक निमार्ण लगाउने र एक घर परिवारको सदस्यले पाँच दिन काम गरे वापत ५० किलो चामल, २ किलो दाल र १ किलो नुन पाउने उनको भनाइ छ।

श्रम कार्यक्रममा सडक मर्मत, खानेपानी मर्मत, सार्वजनिक चौतारा निमार्ण, कुलो निमार्ण तथा मर्मत रहेका छन्।  काम गर्ने नागरिकको स्वास्थ्य र सुरक्षाका सबै प्रक्रिया अपनाइएको गाउँपालिकाका निमित्त प्रमुख प्रशासकीय अधिकृत अमृत खड्काले बताए।  विपन्न परिवारमा देखिएको खाद्यन्न संकट टार्न तत्काल खाद्यन्न वितरण गरेर समस्या समाधान नहुने भएकाले कामका आधारमा खाद्यन्न वितरण गर्ने नीति गाउँपालिकाले बनाएको छ। उनले भने ‘यसले दुई वटा फाइदा छ एउटा जसलाई खाद्यन्न अति आवश्यक छ उ काममा आउने भयो। दोस्रो राहतको दुरुपयोग हुने पनि भएन।’

पहिलो चरणको श्रममा आधारित खाद्यन्न कार्यक्रममा १ सय ६५ र दोस्रो चरणमा १ सय १ जनाले रोजगारी पाएको गाउँपालिकाले जनाएको छ। वडा न १ मा पहिलो चरणमा २५ र दोस्रो चरणमा १३ गरी ३८, वडा न २ मा पहिलो चरणमा २६ र दोस्रो चरणमा १५ गरी ४१, वडा न ३ मा पहिलो चरणमा २७ र दोस्रो चरणमा १७ गरी ४४ जनाले रोजगारी पाएका छन्।

यस्तै वडा न ४ मा पहिलो चरणमा ३३ र दोस्रो चरणमा २० गरी ५३, वडा न ५ मा पहिलो चरणमा ३१ र दोस्रो चरणमा १८ गरी ४९ र वडा न ६ मा पहिलो चरणमा २७ र दोस्रो चरणमा १७ गरी ४४ जनाले रोजगारी पाएको गाउँपालिका अध्यक्ष केसीले बताए । जनसंख्याको आधारमा रोजगारी सृजना गरिएको उनको भनाई छ ।

श्रममा जान नसक्ने असहाय, अति गरिब, अपांगता भएका, ज्येष्ठ नागरिकलाई भने निःशुल्क खाद्यन्न वितरण गरिएको उनले बताए । घरबाट श्रममा जानै नसक्ने घरधुरीको सर्वेक्षण गरी २१३ अति विपन्न परिवारलाई निःशुल्क खाद्यन्न वितरण गरिएको के.सी.ले बताए।