![यस्तो छ सरकारको नीति तथा कार्यक्रम [पूर्णपाठ]](https://dullukhabar.com/wp-content/uploads/2022/05/president-696x392-1-360x180.jpg)
सुर्खेत । कर्णाली प्रदेशका मुख्यमन्त्री महेन्द्र बहादुर शाहीले प्रदेश स्थापना दिवसको अवसरमा यस वर्षपनि शहिद परिवारका सपना पूरा गर्ने बताएका छन् । उनले कर्णाली प्रदेश प्राप्तिका लागि सहादत् प्राप्त गर्ने शहिद परिवारले राख्दै आएका मागहरु पूरा गर्ने प्रतिवद्धता जनाएका हुन् ।
मुख्यमन्त्री शाहीले जनाएको उक्त प्रतिवद्धता यसपटक पहिलो भने होइन ।
अखण्ड मध्यपश्चिमको माग राख्दै २०७२ साउन २३ गतेदेखि वीरेन्द्रनगरमा सुरु भएको आन्दोलनपश्चात भदौ ४ गते तत्कालिन राजनीतिक दलले मध्यपश्चिमका जिल्ला समेटेर छुट्टै प्रदेश बनाउने सहमति गरे ।
सहमतिपछि संविधानमा ७ प्रदेश रहने र साविक कर्णाली अञ्चलका पाँच, भेरीका तीन र राप्तीका दुइ जिल्ला समेटेर ६ नम्बर प्रदेशको व्यवस्था भयो । जसलाई प्रदेशसभाको पहिलो अधिवेशनले ‘कर्णाली प्रदेश’ नामकरण गरेको छ ।
कर्णाली प्रदेश स्थापनाको लागि यहाँका नागरिकलाई त्यति सहज भएन । अखण्ड मध्यपश्चिमको माग गर्दै भएको उक्त आन्दोलनमा सुर्खेतका यामबहादुर बिसी, टीकाराम गौतम, गोपालसिंह रजवार र जुम्लाका हरिबहादुर कुँवरले ज्यान गुमाए ।
प्रदेश स्थापनाका लागि भएको आन्दोलन सफल भएको दिनको सम्झनामा प्रदेश सरकारले भदौ ४ गतेलाई प्रदेश स्थापना दिवस तथा शहीद दिवसको रुपमा मनाउने गरेको छ भने स्थापना दिवसको अवसरमा प्रदेशभर सार्वजनिक विदा दिइन्छ ।
सोही अनुसार यस वर्ष बिहीबार सार्वजनिक विदा पनि दिइएको छ । विहिबार दिवसकै अवसरमा मुख्यमन्त्री तथा मन्त्रीपरिषद्को कार्यालयमा एक कार्यक्रम आयोजना समेत गरिएको छ ।
उक्त कार्यक्रममा मुख्यमन्त्री शाहीले शहिद परिवारका सपना पूरा गर्ने प्रतिवद्धता जनाएका हुन् । कर्णाली प्रदेश सरकारले २०७३ सालदेखि प्रदेश स्थापना दिवस मनाउदै आएको छ । प्रत्येक वर्ष मनाइएको स्थापना दिवसमा मुख्यमन्त्री शाहीले सहिदका सपना पूरा गर्ने बताउँदै आएका छन् ।
प्रदेशको राजनीतिक तथा प्रशासनिक बागडोर सम्हालेका मुख्यमन्त्री शाहीले नै यसरि सहिद परिवारका सपनालाई साकार गर्न तर्फ ध्यान नदिएर दिवसका अवसरमा झुट्ठा आश्वासन मात्र दिएको परिवारका सदस्यको भनाई छ ।
सहिदको सम्मानका लागि उनीहरूका परिवारको निःशुल्क स्वास्थ्य उपचार, रोजगारी, सहिदपार्क निर्माण, सहिद स्मृति प्रतिष्ठान, कर्णाली प्रदेशको प्रवेशद्वारमा सहिद गेट, सहिद परिवारलाई परिचय–पत्र, चारैजना सहिदहरूको शालिक निर्माण, सहिदका नाममा चोक र सहिदका सन्तानलाई उच्च शिक्षासम्म छात्रवृत्तिलगायतको माग राख्दै आएका सहिद परिवारका एउटा पनि माग पूरा भएका छैनन् ।
सहिद यामबहादुर बिसीकी बहिनी भगवती बिसीले प्रदेश स्थापनाको लागि कर्णालीमा चार जनाले सहादत प्राप्त गरेको पाँच वर्ष भए पनि सरकारले भने सहिदका परिवारलाई आश्वासन मात्रै दिएको गुनासो गर्छिन् ।
‘हामीले चित्त बुझाउनेगरी कुनै पनि माग पूरा भएका छैनन्,’ उनले भनिन् ‘भदौ ४ गतेलाई भने सरकारले सहिद दिवसको रूपमा मनाउने निर्णय गरेको छ । यसमा कर्णाली प्रदेश सरकारलाई धन्यवाद छ ।’ तर अन्य करिब एक दर्जन मागमध्ये कुनै पनि माग पूरा गर्नतर्फ सरकारले ध्यान नदिएको बिसीले बताइन् ।
‘प्रदेश प्राप्तिका लागि चार जनाले रगत नबगाएको भए आज हामी सानो काम लिएर पनि सुदूरपश्चिम पुग्नुपर्ने बाध्यता हुन्थ्यो,’ उनी भन्छिन्, ‘तर सरकारले सहिदको अवमूल्यन गरेको जस्तो भएको छ ।’ प्रदेश स्थापनाका लागि बलिदान गर्नेहरूको इतिहास सरकारले भुल्न नहुने उनको भनाई छ ।
सहिद टिकाराम गौतमका छोरा अमृत गौतमलेसमेत सरकारले आश्वासन बाहेक अरु केही दिन नसकेको बताए । ‘हामीलाई अरु केही चाहिएको छैन,’ उनले भने ‘सहिदको सम्मान होस् । सरकारले हामी छोरा–छोरीलाई आत्मनिर्भर बन्न सक्ने बाटोमा सहयोग गरोस् ।’
संघीयताका कारण धेरैले रोजगारी पाए पनि प्रदेश स्थापनाका लागि रगत बगाउनेहरूका छोरा–छोरी बेरोजगार भएको गौतमले बताए । उनले वर्षमा चौबिस हजार छात्रवृत्तिबाहेक सरकारले कुनै पनि सहायता नगरेको गुनासो गरे ।
