![यस्तो छ सरकारको नीति तथा कार्यक्रम [पूर्णपाठ]](https://dullukhabar.com/wp-content/uploads/2022/05/president-696x392-1-360x180.jpg)
सुर्खेत । कर्णाली प्रदेशको भुमी व्यवस्था कृषि तथा सहकारी मन्त्रालय मातहतका कार्यालयले २ करोड ४८ लाख २ हजार रुपैयाँ भ्रमण खर्च गरेका छन् । मन्त्रालय मातहतका २५ वटा कार्यालयले आर्थिक वर्ष २०७६/७७ मा अवलोकन भ्रमण खर्च शिर्षकमा उक्त रकम खर्च गरेका हुन् ।
मन्त्रालय मातहतका कार्यालयमध्ये सबैभन्दा धेरै पशुपंक्षी विकास कार्यालयले रकम खर्च गरेको छ । सो कार्यालयले २१ लाख ५२ हजार रुपैयाँ अनुगमन मूल्यांकन तथा कार्यक्रम कार्यान्वयन र भ्रमण खर्च शिर्षकमा रकम खर्च गरेको मन्त्रालय स्रोतले जनाएको छ ।
त्यस्तै मन्त्रालय स्रोतले दिएको जानकारी अनुसार १८ लाख ९९ हजार एकिकृत कृषि प्रयोगशाला सुर्खेतले खर्च गरेको छ भने १८ लाख ३८ हजार कृषि तथा पशुपंक्षी व्यवसाय प्रवद्र्धन प्रशिक्षण केन्द्र सुर्खेतले खर्च गरेको छ ।
यस्तै सबैभन्दा बढि रकम खर्च गर्ने चौंथो स्थानमा कृषि विकास निर्देशनालयले १५ लाख भ्रमण खर्च गरेको छ ।
बागवानी विकास केन्द्र दार्मा हुम्लाले ८ लाख ६९ हजार रुपैयाँ भ्रमण खर्च गरेको छ भने जुफाल डोल्पा कार्यालयले ७ लाख ३० हजार खर्च गरेको मन्त्रालयले जनाएको छ ।
त्यस्तै मन्त्रालय मातहतकै कार्यालय भुमी व्यवस्था तथा सहकारी रजिष्ट्रार कार्यालयले जम्मा १ लाख ४० हजार रकम भ्रमण खर्च गरेको छ ।
कृषि विकास कार्यालयमध्ये हुम्लामा धेरै
भुमी व्यवस्था कृषि तथा सहकारी मन्त्रालय मातहतको कृषि विकास निर्देशनालय हुम्लाले भ्रमण खर्च वापत सबैभन्दा धेरै रकम खर्च गरेको छ । उक्त कार्यालयले प्रदेशका अन्य जिल्लाको तुलनामा धेरै रकम खर्च गरेको हो ।
हुम्ला कार्यालयको आर्थिक वर्ष २०७६/०७७ मा जम्मा ११ लाख ५ हजार खर्च भएको छ भने सबैभन्दा कम कृषि विकास कार्यालय कालिकोटले रकम खर्च गरेको छ ।
कालिकोट कार्यालयले जम्मा ६ लाख १२ हजार खर्च गरेको मन्त्रालय स्रोतले जनाएको छ ।
मन्त्रालयले दिएको जानकारी अनुसार कृषि विकास कार्यालय जाजरकोटको ९ लाख ५ हजार, डोल्पाको ९ लाख ४ हजार र मुगु कार्यालयको ६ लाख ६० हजार भ्रमण खर्च भएको छ ।
त्यस्तै कृषि विकास कार्यालय सल्यानको ६ लाख ५० हजार, दैलेखको ६ लाख ४९ हजार र जुम्ला कार्यालयको ८ लाख ४९ हजार भ्रमण खर्च रहेको छ ।
पशु अस्पतालमध्ये सबैभन्दा हुम्लाकै धेरै खर्च
भुमी व्यवस्था कृषि तथा सहकारी मन्त्रालय मातहतको पशु अस्पताल तथा पशुसेवा कार्यालय हुम्लाको भ्रमण खर्च प्रदेशका अन्य जिल्लाको तुलनामा धेरै देखिएको छ ।
हुम्ला कार्यालयले आर्थिक वर्ष २०७६/०७७ मा १२ लाख खर्च गरेको छ भने सबैभन्दा कम जुम्ला कार्यालयले जम्मा ७ लाख रकम भ्रमण खर्च गरेको छ ।
मन्त्रालय स्रोतका अनुसार पशुअस्पताल तथा पशु सेवा कार्यालय दैलेखले ८ लाख ५० हजार, रुकुम पश्चिमले ९ लाख १० हजार, जाजरकोटले ८ लाख र सल्यान कार्यालयले १० लाख ९० हजार रकम भ्रमण खर्च गरेका छन् । साथै सल्यान कार्यालयले ३ लाख रुपैयाँ चियापान खर्च समेत गरेको छ ।
त्यस्तै पशु अस्पताल तथा पशु सेवा कार्यालय कालिकोटले ८ लाख ५० हजार, मुगुले १० लाख र डोल्पा कार्यालयले ९ लाख भ्रमण खर्च गरेको मन्त्रालयले जनाएको छ ।
