आफु अनुकुलको कम्पनीले काम नपाउने भएपछि अधिकृतद्वारा टेण्डर रद्ध

सुर्खेत ।
दैलेखको एक गाउँपालिकाका कार्यालय प्रमुखले आफु अनुकुलको निर्माण कम्पनीले काम नपाउने भएपछि टेण्डर रद्ध गरेको खुलेको छ । जिल्लाको भैरवी गाउँपालिकाका निमित्त प्रमुख प्रशासकीय अधिकृत हिरासिंह थापाले यस्तो कार्य गरेको खुलेको हो ।
गाउँ कार्यपालिकाको कार्यालयले २०७६ साल फागुन ५ गते प्रथम पटक प्रकाशित ३० औं दिने सिलबन्दी बोलपत्र आह्वानको सूचना प्रकाशित ग¥यो ।
सूचना अनुसार ठेक्का नम्बर २३।२०७६।०७७ मा आधारभुत स्वास्थ्य सेवा केन्द्र भवन निर्माण भैरवी ५ र ठेक्का नम्बर २४।२०७६।०७७ मा आधारभुत स्वास्थ्य सेवा केन्द्र भैरवी ६ भवन निर्माणका लागि ईजाजत प्राप्त निर्माण व्यवसायीहरुद्वारा सिलबन्दी आह्वान गरिएको थियो ।
सोही सूचनाका आधारमा १० वटा निर्माण व्यवसायीहरुले बोलपत्र दर्ता गराएका थिए ।
सूचना प्रकाशित मितिको ३१ औं दिन सिलबन्दी बोलपत्र खोल्दा रोहित कन्स्ट्रक्सन र रामचन्द्र निर्माण सेवा पहिलो नम्बरमा थिए भने दोस्रो नम्बरमा पूर्णिमा कन्स्ट्रक्सन रहेको थियो ।
कार्यालयले आधारभुत स्वास्थ्य केन्द्र भवन निर्माण भैरवी ५ का लागि ३३ लाख ४० हजार २ सय ६६ रुपैयाँ १९ पैसा भ्याट र कन्टीजेन्सी बाहेकको दरमा र अर्को आधारभुत स्वास्थ्य केन्द्र भवन निर्माण भैरवी ६ को पनि सोही बराबरको रकममा टेण्डर आह्वान गरेको थियो ।
बोलिएको दररेटमा सबैभन्दा बढि रकम घटेर पहिलो नम्बर हुने उक्त कम्पनीले स्वास्थ्य केन्द्र भवन निर्माण भैरवी ५ को लागि ३० प्रतिशत र स्वास्थ्य केन्द्र भवन निर्माण भैरवी ६ को लागि १८ प्रतिशतमा घटेर काम सम्पन्न गर्ने कवुल गरेको थियो ।
तर उक्त कम्पनीले भने सिलबन्दी बोलपत्रमा माग गरेअनुसारको धरौटी रकम जम्मा गरेको बैंक भौचर र स्वघोषणा पत्र बोलपत्रमा संलग्न नराखेको पाइएको थियो ।
सूचनाको २ नम्बर बुदाँमा ‘बोलपत्रको प्रत्येक पानामा सहिछाप गरी देहाय बमोजिमको कार्यको लागि नियमानुसारको धरौटी रकम सिलबन्दी बोलपत्र साथ कम्तिमा ४ महिना (१२० दिन) म्याद भएको जमानीपत्र (विड वण्ड) वा यस कार्यालयको नाममा सिभिल बैंक भैरवी शाखामा रहेको ग ३ ०६६१०१८२९०६०४७ धरौटी खातामा धरौटी वापतको रकम जम्मा गरेको सक्कलै बैंक भौचर सिलवन्दी बोलपत्रका साथ संलग्न राखि यस कार्यालयमा दर्ता गर्नुपर्नेछ ।’ भनि उल्लेख गरिएको छ ।
उक्त निर्माण कम्पनी र अधिकृत थापाको मिलेमत्तो भएकोले आलटाल गरी सोही कम्पनीलाई छनौट गरिएको अन्य निर्माण कम्पनीका प्रतिनिधीको आरोप छ ।
नियमानुसार बोलपत्र खोलिएपश्चात घटाघटबाट छनौट भएको पहिलो निर्माण कम्पनीले पेश गरेका कागजात पूर्ण नभए क्रमशः दोस्रो निर्माण कम्पनीलाई छनौट गरि आशय पत्रको सूचना सार्वजनिक गरिनुपर्ने हो तर अधिकृत थापाले भने उक्त आफु अनुकुल छनौट भएको कम्पनीले ठेक्का नपाउने भएपछि आशय पत्रको सूचना सार्वजनिक नगरेको पूर्णिमा कन्स्ट्रक्सनका प्रोपराईटर रमेश हमालको भनाई छ ।
दोस्रो नम्बरमा रहेको पूर्णिमा कन्स्ट्रक्सनले दुईवटै भवन निर्माणको लागि जम्मा रकमको १७.५÷१७.५ प्रतिशन घटेर काम गर्ने कवुल गरेको थियो ।
कार्यालयले टेण्डरका लागि निर्माण कम्पनी छनौट भएको ४ महिनासम्म पनि आशय पत्रको सूचना सार्वजनिक नगरेर मिति २०७७ असार २१ गते टेण्डर रद्द गरेको सूचना निकालेको छ ।
यता, कार्यालयले भने कोरोना भाइरसबाट सर्ने रोग कोभिड १९ को कारण देखाउदै टेण्डर रद्द गरिएको बताएको छ ।