६ खर्ब ६४ अर्बको फछर्योट हुन बाँकी : ४ खर्ब १८ अर्ब बेरुजु

काठमाडौं । मुलुकका विभिन्न निकायको आव २०७५/ ७६ र त्यसअघिको बक्यौतासमेतको लेखा परीक्षणमा बेरुजुसहित टुंगो अर्थात् फछर्योट गर्नुपर्ने रकम रू. ६ खर्ब ६४ अर्ब ४४ करोड कायम भएको छ ।

महालेखापरीक्षकको कार्यालयले राष्ट्रपति विद्यादेवी भण्डारीसमक्ष बुुधवार पेश गरेको महालेखापरीक्षकको ५७ औं वार्षिक प्रतिवेदन २०७७ अनुसार तदारुकता, राजस्व बक्यौता समायोजन एवं असूली, शोधभर्ना प्राप्तिमा सुधारलगायत कारणले यस वर्ष केही कमी भई उक्त बेरुजु कायम भएको हो ।

गत वर्षसम्मको बाँकी बेरुजु रू.३ खर्ब ७७ अर्ब ४८ करोड रहेकामा फछ्र्योट भएको अंक घटाई यस वर्ष थप भएको रू. ४० अर्ब ८४ करोडसमेत गरी रू.४ खर्ब १८ अर्ब ३२ करोड बाँकी बेरुजु रहेको प्रतिवेदनमा उल्लेख छ ।

महालेखापरीक्षक टंकमणि शर्मा दंगालले राष्ट्रपतिसमक्ष बुधवार पेश गरेको  प्रतिवेदनअनुसार आव २०७५/ ७६ मा लेखा परीक्षण तथा सम्परीक्षणबाट रू.७ अर्ब ४८ करोड असूल भएको छ । अद्यावधिक कारवाही गरी टुंगो लगाउनुपर्ने रकम गत वर्ष रू.६ खर्ब ८३ अर्ब ६६ करोड रहेकामा यस वर्ष केही कमी आई बेरुजु रकम रू.६ खर्ब ६४ अर्ब ४४ करोड कायम भएको प्रतिवेदनमा उल्लेख छ ।

नेपालको संविधान र लेखा परीक्षण ऐन २०७५ बमोजिम संघ, प्रदेश र स्थानीय तहका सबै सरकारी कार्यालय र पूर्ण स्वामित्व भएको संगठित संस्थाको नियमितता, मितव्ययिता, कार्यदक्षता र प्रभावकारिता र औचित्यसमेत विचार गरी महालेखापरीक्षकबाट अन्तिम लेखापरीक्षण हुने व्यवस्था छ ।

यस वर्ष नियमित र यसअघिका लेखा परीक्षण गर्न बाँकीसमेत गरी ५ हजार ६१९ निकायको आर्थिक कारोबारको लेखा परीक्षण गरिएको छ । यस पटक फागुन मसान्तसम्ममा लेखापरीक्षण योजना तयार पारी चैत मसान्तसम्ममा वार्षिक प्रतिवेदन पेश गर्ने कार्यतालिका भए पनि कोभिड–१९ का कारण विलम्ब हुन गएको हो ।

यस वर्ष संघीय, प्रदेश सरकारी निकाय, स्थानीय तह, संगठित संस्था, समिति र अन्य संस्था, जिल्ला समन्वय समितिको गरी रू. ५१ खर्ब ७१ अर्ब ६४ करोडको लेखापरीक्षण सम्पन्न भएको छ ।

सोमध्ये ३ हजार ११० संघीय सरकारी निकाय र ७७ जिल्ला समन्वय समितिका तर्फ रू. १७ खर्ब ५६ अर्ब ४ करोडको लेखापरीक्षणबाट रू. ७१ अर्ब ६ करोड अर्थात् ४ दशमलव शून्य ५ प्रतिशत बेरुजु देखिएको छ ।

प्रदेशतर्फ  ९९८ ओटा कार्यालयको रू. १ खर्ब ८९ अर्ब २५ करोडको लेखापरीक्षणबाट रू. ८ अर्ब २० करोड अर्थात् ४ दशमलव ३३ प्रतिशत बेरुजु कायम भएको छ । मुलुकभर रहेका स्थानीय तहको रू.७ खर्ब ४० अर्ब ६५ करोडको लेखापरीक्षणबाट रू.३८ अर्ब १३ करोड अर्थात् ५ दशमलव १५ प्रतिशत बेरुजु देखिएको छ ।

यस्तै सार्वजनिक संस्था तथा अन्य समितिको रू.२४ खर्ब ९८ अर्ब ८७ करोडको लेखापरीक्षण सम्पन्न भएको बताइएको छ । त्यसका अतिरिक्त ३२ ओटा संगठित संस्थाको लेखापरीक्षणका लागि परामर्श उपलब्ध गराएबमोजिम रू.७ खर्ब ४७ अर्ब ८० करोडको लेखापरीक्षण भएको छ । सोसमेत गरी यस वर्ष रू. ६१ खर्ब  २२ अर्ब ४९ करोडको लेखापरीक्षण सम्पन्न भएको महालेखापरीक्षकको कार्यालयले बताएको छ ।

नेपालको संविधानको धारा २४१ मा लेखापरीक्षकले संघीय, प्रदेश र स्थानीय तह तथा कानूनद्वारा तोकिएका संस्थाको नियमितता, मितव्ययिता, कार्यदक्षता, प्रभावकारिता र औचित्यको समेत विचार गरी लेखापरीक्षण गर्ने व्यवस्था छ । संविधानको धारा २९४ मा उक्त प्रतिवेदन राष्ट्रपतिसमक्ष प्रतिवेदन पेश गर्नुपर्ने व्यवस्था छ । रासस

0 Comments

*Enter your name

*Email not valid.

*2 characters minimum.

Do not change these fields following