कृषि वस्तु बजारीकरणमा सहजीकरण गर्दै कृषि कार्यालय

पंखबहादुर शाही

दैलेख । कृषि विकास कार्यालय दैलेखले कृषकद्वारा उत्पादित कृषि वस्तुको बजारीकरणमा सहजीकरण गर्ने कामलाई निरन्तरता दिएको  छ । उत्पादित कृषि वस्तु बजारीकरणको अभावमा बारीमै कुहिन नदिन कार्यालय सहजीकरणमा जुटेकोे हो ।

त्यसका लागि कार्यालयले एउटा गाडीको समेत व्यवस्था गरेको  छ । प्रदेश सरकारको निर्णय अनुसार नै सो कार्यलाई निरन्तरता दिएको हो । हालसम्म महावु, नौमुले, डुङ्गेश्वर, गुराँस गाउँपालिका तथा नारायण र दुल्लू नगरपालिकाका केही व्यावसायिक कृषकहरुको तरकारी बजारीकरण गरिएको कार्यालयले जानकारी दिएको छ ।

कार्यालयका अनुसार हाल सम्म १ सय ८० क्वीन्टल आलु, ३८ क्वीन्टल पकेट क्षेत्र अन्तर्गतको उन्नत विउ, काँक्रा, फर्सि लगायत ८० क्वीन्टल बराबरको तरकारीलाई बजारीकरण गरिएको छ ।

त्यस मध्ये नारायण नगरपालिका–२ का व्यावसायिक कृषकले उत्पादन् गरेको तरकारी र डुङ्गेश्वर गाउँपालिकाका केही तरकारी फर्मद्वारा उत्पादित केही कृषि वस्तुलाई जिल्ला सदरमुकाममा खपत गर्ने प्रबन्ध मिलाइएको छ भने महावु गाउँपालिकाका विभिन्न क्षेत्रमा उत्पादित आलु र गुराँस गाउँपालिकाको तरकारी सुर्खेत पठाइएको छ ।

कार्यालयका प्रमुख तिलक पाण्डेले कृषि उपज बजारीकरण व्यवस्थान गर्नका लागि दुई ओटा समिति बनाइएको  बताए । समूह अन्तर्गत सहजीकरणको कामलाई निरन्तरता दिइएको उनले बताए । ‘हामीले सदरमुकाममा रहेका केही मण्डीहरुको नियमित अनुगमन र आपूर्तिको अबस्थाका बारेमा जानकारी लिने गरेका छौं,’ उनले भने । त्यही अनुसार कृषकहरुलाई तरकारी तथा फलफुल बजारमा ल्याउने प्रबन्ध मिलाइएको छ ।

पाण्डेका अनुसार बन्दाबन्दीको सुरुवातीमा तरकारी पसलहरु बन्द हुँदा केही समस्या आयो तर, अहिले नियमित खोल्न र कृषि बस्तु बजारीकरण गर्न सहजीकरण गरिएको छ ।

यस्तै ११ ओटै स्थानीयतहका कृषि शाखाका प्राविधिकहरुसँग समन्वय गरेर सम्बन्धित ठाउँको कृषि क्षेत्रमा परेको समस्याका बारेमा नियमित जानकारी लिने गरिएको छ । ‘तर, अहिलेसम्म खासै समस्या आएको पाइँदैन,’ उनले भने ।

तरकारी र दूध विक्रीका लागि समय तालिका 

नारायण नगरपालिका आसपासका कृषकहरुलाई दूध र तरकारी बेच्नका लागि बिहान ६ बजेदेखि ८ बजे सम्मको समय तोकिएको छ ।

कृषकले सदरमुकाममा तरकारी र दुध ल्याउने भएकाले उनीहरुको  परिश्रम खेर जान नदिनका लागि यो समय तालिका निर्धारण गरी सहजता ल्याइएको प्रमुख जिल्ला अधिकारी युवराज कट्टेलले जानकारी दिए ।

११ ओटै स्थानीय तहहरुमा बार्षिक १५ करोड बराबरको तरकारी तथा दुधजन्य बस्तुको मात्र उत्पादन हुने कृषि विकास कार्यालयले बताएको छ  । प्रशासनको निर्णय कृषक र उपभोक्ता दुबैको हितमा भएको कृषकहरुले भनाई छ ।

यस्तै पश्चिम दैलेखका आठबीस, चामुण्डाबिन्द्रासैनि नगरपालिका तथा ठाटीकाँध गाउँपालिकाका विभिन्न ठाउँमा उत्पादन गरिएको कृषि बस्तु स्थानीय स्तरमा नै खपत हुने भएकाले खास्सै समस्या देखिएको छैन ।

व्यावसायिक कृषकको तथ्यांक संकलन गरिने

कृषि विकास कार्यालयका अनुसार आउँदो वर्षदेखि जिल्लाभर व्यावसायिक रुपमा तरकारी तथा फलफूलखेती गर्ने कृषकहरुको तथाङ्क संकलन गरिने छ  ।

कार्यालयका प्रमुख तिलक पाण्डेले भने, ‘उनीहरुको रेकेर्ड राखिने र सम्भव भएसम्म परिचय पत्र नै उपलब्ध गराउनुपर्छ भनेर प्रस्ताव अघि बढाएको छु ।’

यदि त्यो कार्यलाई अघि बढाई उनीहरूलाई प्रोत्साहन गर्न सके कृषिमा युवाहरुको लगाव बढ्ने देखिन्छ । ‘हामीकहाँ महामारी भन्दा छिटो भोकमरी आउने गर्छ, त्यसैले जस्तोसुकै बाँझो जमिनमा पनि खेती गरी उत्पादन बढाउनका लागि पहल भइरहेको  छ,’ पाण्डेले भने ।  आर्थिक अभियान् ।