सभामुखकाे वडामा लकडाउनकाे दशाैँ दिनमा ‘क्वारेन्टाइन्’

 

दैलेख । कर्णाली प्रदेशका सभामुख राजबहादुर शाहीको वडामा लकडाउन भएको दशौं दिनमा क्वारेन्टाईन तयार भएको छ । (कोभिड १९) को संक्रमण फैलिन नदिनको लागि नेपाल सरकारले लकडाउन गरेको दशौं दिनमा ठाटीकाँध गाउँपालिका –६ ले ५ वेडको क्वारेन्टाईन तयार गरेको छ ।
सञ्चार माध्यममा ‘भारतबाट आएका गाउँ गाउँमा,निर्देशन नै टरेन गाउँपालिकाले’ समाचार प्रकाशित भएपछि ठाटीकाँध गाउँपालिका –६ ले गाउँपालिकामै पहिलो पटक क्वारेन्टाईन तयार पारेको हो ।

लकडाउनको समस्या देखाउँदै ठाटीकाँध गाउँपालिकाले बुधवार सम्म एउटा पनि क्वारेन्टाईन बनाएको थिएन् । ठाटीकाँध गाउँपालिकामा भारत वा तेस्रो मुलुकबाट १ सय ५७ जना गाउँमा भित्रिएका जिल्ला प्रशासन कार्यालयले जारी गरेको सुचनामा उल्लेख गरिएको छ ।
ठाटीकाँध गाउँपालिका वडा–६ ले भने स्थानीय ठाटीकाँध बजारबाट साबुन, पानी पिउने फिल्टर कपडा खरिद गरि ५ वेडको क्वारेन्टाईन बनाएको वडाअध्यक्ष मनबहादुर सिजापतिले जानकारी दिए ।

उनले भने,गाउँपालिकाले मगाएको सामाग्री आउँदै भन्ने सुनिएको छ । कहिले आउने हो थाहा छैन । मैले स्थानीय बजारबाटै ल्याएर तयार बनाए, सिजापतिले भने । सो वडामा फागुन महिनामा १ जना दुवई, १० जना भारतबाट गाउँमा आएपनि यो महिना विदेशबाट कोही गाउँमा आएका छैनन ’,सिजापतिले थपे ।

गाउँपालिका प्रमुख,समन्वय उपप्रमुख वडा क्वारेन्टाईन विहिन !

दैलेख जिल्ला समन्वय समितिकी उपप्रमुख लक्ष्मी शाह र ठाटीकाँध गाउँपालिका प्रमुख धिरबहादुर शाहीको वडामा अझै सम्म क्वारेन्टाईन तयार गरिएको छैन । जिल्ला समन्वय समितिकी उपप्रमुख लक्ष्मी शाह ठाटीकाँध गाउँपालिका –१ स्थानीय बासिन्दा हुन् भने भने गाउँपालिका अध्यक्ष धिरबहादुर शाही वडा नं –२ रैथाने बासिन्दा हुन् ।

क्वारेन्टाईन नहुँदा ती गाउँका स्थानीयबासी कोरोना भाईरस फैलिन सक्ने भन्दै त्रसित भएका छन् । ‘भारतबाट आएका सबै गाउँ गाउँमा छन् ।

गाउँपालिकाले क्वारेन्टाईन नबनाउँदा घरमै बस्नु बाहेक अर्को विकल्प छैन ठाटीकाँध गाउँपालिका वडानं –१ का दिपेन्द्र कुमार बमले बताए । उनले भने,नेता भएर के गर्नु निति नै मान्दैनन् ।

नेपाल सरकार र सामान्य प्रशासन मन्त्रालयले स्थानीय तहमा क्वारेन्टाईन बनाउन निर्देशन दिए पनि गाउँपालिका अध्यक्षले अहिले सम्म सुनुवाई गरेका छैनन् । लक्ष्मी शाह पुर्व जलश्रोत राज्यमन्त्री विनोद कुमार शाहको पत्नी हुन् ।

क्वारेन्टाईन बनाउनको लागि आवश्यक सामाग्री नहुँदा बनाउने काम ढिलो भएको ठाटीकाँध गाउपालिकाका प्रमुख प्रशासकिय अधिकृत बाबुराम नेपालीले बताए ।

उनले भने,लकडाउने गर्दा सामाग्री नआउँदा ढिलो भएको हो । आज साँझ सम्म सामाग्री आएर भोली तयार गरिन्छ,उनले भने ।

“नेपालीका अनुसार प्रत्येक वडामा १५/१५ बेडको क्वारेन्टाईन, आवाश्यक चाहिने ५० ओटा सिरक, तन्ना, कार्पेट, २५ सेट पिपिय, १० बेडको आईसोलेसन,२५ हजार पिस साबुन, २५ हजार जतिनै मास्क सामाग्री खरिद गरिएको छ ।”

भारत वा तेस्रोमुलक बाट समन्वय उपप्रमुखको वडामा ३४ र गाउँपालिका अध्यक्ष धिरबहादुर शाहीको वडामा ४३ जना भारतबाट गाउँ आएका छन् ।

त्यसैगरि ठाटीकाँध गाउँपालिका –३ का स्थानीयबासी पुर्व साँसद रंगबहादुर शाहीको वडामा पनि क्वारेन्टाईन बनाईएको छैन । शाहीको वडामा भारत वा तेस्रो मुलुकबाट घरमा आउनेको संख्या १ सय १६ रहेको छ ।