लक्षित वर्गलाई उद्यमी बनाउदै महाबु गाउँपालिका

दैलेख (महाबु) । दैलेखको महाबु गाउँपालिकाका लक्षित वर्गका नागरिकलाई उद्यमी बनाउन लागिएको छ । गाउँपालिकाका वार्षिक न्यूनतम् ३५ हजारभन्दा कम आम्दानी हुने घरधुरी छनौट गरि परिवारका एक सदस्यलाई गरीवी निवारणका लागि लघुउद्यम कार्यक्रम (मेड्पा) अन्र्तगत लघुउद्यमी कार्यक्रममा सहभागी गराउन लागिएको हो ।
गाउँपालिकाले यस आर्थिक वर्षमा लघुउद्यम कार्यक्रम मार्फत छनौटमा परेका लक्षित वर्गका परिवारका सदस्यलाई उनिहरुको आकांक्षा अनुसारको तालिम प्रदान गर्न लागिएको गाउँपालिकाका अध्यक्ष जंगबहादुर शाहीले जानकारी दिए ।
‘गाउँपालिकाले समुदायका लक्षित वर्गको पहिचान गरि उनिहरुको चाहना अनुरुप आधारभुत सिलाई–कटाई, होजियारी, मुडा बनाउने, दालमोठ मसला बनाउने, औलो प्रशोधन लगायतका ट्रेनिङ्गहरु सञ्चालन गर्दै आएको छ’ अध्यक्ष शाहीले भने, ‘जनतालाई उद्यमी बनाएर गरिवी निवारण गरी समृद्ध महाबु, सुखी महाबुका जनता बनाउने अभियानमा छौं ।’
उक्त तालिमका लागि गाउँपालिकाले यसै आर्थिक वर्षमा १२ लाख रकम विनियोजन गरेको अध्यक्ष शाहीले बताए । तालिम प्राप्त भईसकेपछि सहभागीहरुलाई व्यवसायका लागि थप औजारहरु उपलब्ध गराउनुका साथै लगानी वातावरण सिर्जना गर्न आगामी बजेटमा समेटी निरन्तरता दिने अध्यक्ष शाहीको भनाई छ ।
गाउँपालिका र व्यवसायिक सेवा प्रदायक संस्था सेती ट्रनिङ्ग एण्ड रिसर्च सेन्टर शाखा दैलेखको समन्वयमा उक्त कार्यक्रमहरु सञ्चालन भएको अध्यक्ष शाहीले बताए ।
रिसर्च सेन्टर शाखा दैलेखका कार्यक्रम संयोजक कर्ण खत्रीका अनुसार गाउँपालिकामा उद्यमी बन्न चाहेका ४३ जना नयाँ व्यक्तिहरुलाई तालिममा सहभागी गराईएको छ भने तालिम लिनुपूर्व केही ज्ञान हासिल गरिसकेका पुराना २३ जनालाई उनिहरुको स्तरउन्नतिका लागि तालिम सहभागी गराईएको छ । गाउँपालिकामा नयाँ र पुराना गरी जम्मा ७३ जनालाई तालिममा सहभागी गराइएको छ ।
गाउँपालिकाका सबै वडामा घरधुरी सर्वेक्षण सहभागीतामूलक ग्रामिण लेखाजोखा (एसवाईवि) सम्बन्धी ८ दिने तालिम सम्पन्न गराई गरिवी निवारण अन्र्तगतका कार्यक्रममा सहभागी छनौट गरिएको संयोजक खत्रीले बताए ।
‘गाउँपालिकाका प्रत्येक वडामा न्यूनतम् वार्षिक ३५ हजारभन्दा कम आयस्रोत भएका घरपरिवारबाट एकजना छनौट गरि एसवाईवी सम्बन्धी ८ दिने तालिम सम्पन्न गरिएको हो’ संयोजक खत्रीले भने, ‘उक्त ८ दिने तालिममा सहभागी भएकाहरुमध्ये उनिहरुको ईच्छा बमोजिमको गरिवी निवारण अन्र्तगतको तालिममा सहभागी गराएका छौं ।’
उनका अनुसार गाउँपालिकाको वडा नम्बर १ मा १३ जनालाई व्यवसायिक कुखुरापालन सम्बन्धी तालिम र वडा नम्बर २ र ३ मा १३÷१३ जनालाई आधारभुत हाते र मेशिनरी होजियारी तालिम सञ्चालन गरिएको छ ।
त्यस्तै गाउँपालिकाको वडा नम्बर ४ मा १३ र वडा नम्बर ५ मा १२ जनालाई आधारभुत सिलाई कटाई तालिम सञ्चालन गरिएको छ भने गाउँपालिकाको वडा नम्बर ६ मा एसवाईवी सम्बन्धि ८ दिने तालिममा स्थानीय सहभागी नभएपछि कार्यक्रम सञ्चालन गर्न नसकिएको संयोजक खत्रीले जानकारी दिए । ‘वडा नम्बर ६ मा ३ दिनसम्म पनि छनौट भएकाहरु सहभागी नभएपछि एसवाईवी तालिम सम्पन्न गर्न सकिएको छैन’ खत्रीले भने ।
तालिमका सहभागीहरुलाई दैनिक ८८ रुपैयाँका दरले खाजाको व्यवस्था समेत गरिएको छ । साथै तालिम अवधिसम्म आवश्यक प्रयोगात्मक सामग्रीहरु सेन्टरका तर्फबाट उपलब्ध गराईने बताइएको छ भने तालिममा प्रयोग गरिएका औजारहरु तालिमपश्चात सहभागीहरुले लिन पाईने संयोजक खत्रीको भनाई छ । गरिवी निवारण अन्र्तगतका कार्यक्रम आगामी जेठ १५ गतेसम्म सम्पन्न गर्ने लक्ष्य राखिएको छ ।
सेती ट्रेनिङ्ग एण्ड रिसर्च सेन्टर शाखा दैलेखले निर्वाचन क्षेत्र नम्बर १ का ६ वटा स्थानीय तहसँग समन्वय गरी यस्ता कार्यक्रमहरु सञ्चालन गर्दै आएको छ । दैलेखका नारायण नगरपालिका, महाबु गाउँपालिका, नौमूले गाउँपालिका, डुङ्गेश्वर गाउँपालिका, गुराँस गाउँपालिका र भगवतिमाई गाउँपालिकामा यस्ता कार्यक्रमहरु गरेको छ । सेन्टरले यो आर्थिक वर्षभित्र जिल्लाका १९६ जना नयाँ र १०० जना पुराना उद्यमीलाई तालिम दिने लक्ष्य राखेको छ ।

0 Comments

*Enter your name

*Email not valid.

*2 characters minimum.

Do not change these fields following