![यस्तो छ सरकारको नीति तथा कार्यक्रम [पूर्णपाठ]](https://dullukhabar.com/wp-content/uploads/2022/05/president-696x392-1-360x180.jpg)
सुर्खेत । प्रदेश सभाका सदस्य अम्बर बहादुर थापाले जनता सरकारप्रति असन्तुष्ट भएको भन्दै बजेट कार्यान्वयन गर्न प्रदेश सरकारलाई आग्रह गरे । कर्णाली प्रदेश सभाको पाचौं अधिवेशनको विशेष समयमा बोल्दै सांसद थापाले बजेट विनियोजन गर्दा जनतालाई आश्वस्त पारिएको तर कार्यान्वयनमा ढिलाई भएको
बताए ।
‘जनतालाई बजेट यति छ भन्दै सांसदहरुले पत्रकार सम्मेलन समेत गरेर आश्वस्त तुल्याइयो’ सांसद थापाले भने, ‘तर बजेट खर्च भएन, जनता उत्साहित होइन, असन्तुष्ट हुने अवस्था सिर्जना भएको छ ।’
सांसद थापाले सरकार बजेट कार्यान्वयनको हिसावले जानुपर्ने गतिमा जान नसकेको बताए । उनले सरकारको काम कार्वाहीले जनताले पाउनुपर्ने सेवासुविधा समेत पाउन नसकेको जानकारि दिए ।
‘सरकार यही मोडालिटीमा गए, समृद्ध कर्णाली, सुखारी कर्णालीवासी नारा सार्थक हुन सक्दैन’ सांसद थापाले भने, ‘लक्षित वर्गका ५१ प्रतिसत जनताले सेवा सुविधा प्राप्त गर्न सकेका छैनन् भने कसरी समृद्धिको कल्पना गर्न सकिन्छ ।’
सरकारलाई प्राथमिकताका आधारमा बजेट विनियोजन र कार्यान्वयन गर्न पटक–पटक सुझाव दिँदासमेत काम गर्न नसकेको उनको धारणा थियो ।
त्यस्तै विशेष समयमा बोल्दै प्रमुख प्रतिपक्षी दल नेपाली काँग्रेसका सचेतक हिमबहादुर शाहीले पनि बजेट कार्यान्वयन यथाशिघ्र गरिनुपर्ने बताए । ‘कर्णाली प्रदेश, अर्गानिक प्रदेश र डिजिटल प्रदेशको नामले परिचित प्रदेशमा बजेट कार्यान्वयन हुनसकेन’ सांसद शाहीले भने, ‘बजेटको साढे ३÷४ प्रतिसत सम्झौता भएको छ भने ०.१ प्रतिसत बजेट मात्र कार्यान्वयन
भएको छ ।’
उनले पूर्वाधार क्षेत्र विकास कार्यविधि १५ दिनमै संशोधन गरिएको भन्दै आपत्ति प्रकट गर्दै उनले संसदमा प्रश्न गरे, ‘समानुपातिक संसदलाई समेटिएकोमा किन हटाईयो, यदि हटाउनैपर्ने भए अनुगमन समितिबाट पनि हटाइयोस् ।’
