![यस्तो छ सरकारको नीति तथा कार्यक्रम [पूर्णपाठ]](https://dullukhabar.com/wp-content/uploads/2022/05/president-696x392-1-360x180.jpg)
सुर्खेत । कर्णाली प्रदेशको पर्यटन प्रवद्र्धनका लागि यातायात व्यवासायीले विविध क्रियाकलाप गर्ने भएका छन् । बिहिबार ‘कर्णाली पयर्टन प्रवद्र्धनमा प्रदेश सरकारसँग प्रालिको सहकार्य सम्बन्धी विशेष कार्यक्रम’को आयोजना गर्दै सुर्खेत काँक्रेविहार यातायात प्रालिले विविध क्रियाकलाप सञ्चालन गर्न लागिएको जानकारी दिएको हो ।
प्रालि र प्रदेश सरकारबीच पर्यटन प्रवर्द्धनका लागि सहकार्य भएकाे छ । उक्त सहकार्यसँगै भ्रमण वर्षका लागि लाेगाे अंकित स्टिकरहरू प्रालिद्वारा सञ्चालित सवारी साधनहरूमा टाँसिएकाे छ । नेपाल भ्रमण वर्ष २०२० लाई सफल बनाउन प्रदेश सरकारसँग सहकार्य गर्दै अघि बढ्न लागिएको प्रालिका अध्यक्ष रमेशकुमार सापकोटाले जानकारी दिए ।
कार्यक्रमको अवसरमा प्रालिले १० वटा नयाँ बस सञ्चालनमा ल्याएको छ भने १० वटा सञ्चालनका लागि तयारी अवस्थामा रहेको जनाइएको छ । ‘प्रालिले भ्रमण वर्षलाई लक्षित गरी ९ करोड बराबरको लगानीमा यी बसहरु सञ्चालनमा ल्याएको छ’ अध्यक्ष सापकोटाले भने, ‘जोखीम मोलेरै भएपनि भ्रमण वर्षलाई सार्थक बनाउने योजनामा छौं ।’
भ्रमण वर्षलाई लक्षित गर्दै प्रालिद्वारा सञ्चालित सबै सवारी साधनहरुमा ‘नेपाल भ्रमण वर्ष २०२०’ र ‘यसपााली घुमौं कर्णाली’ को लोगो सहितका कर्णालीका पर्यटकीय स्थलहरुको स्टिकर टाँस्ने भएको छ ।
त्यस्तै प्रालिद्वारा सञ्चालन भएका सवारी साधनहरुमा यात्रुबाट लिएको प्रतिटिकट २ रुपयाँ सामाजिक सेवाको लागि छुट्याईने अध्यक्ष सापकोटाले बताए । ‘कुनैपनि यातायात प्रालिले सुचारु नगरेको विल्कुलै नयाँ अभियान सुरुवात गरेका छौं’ उनले भने, ‘यो दिर्घकालिन योजना भएकोले पनि थोरै रकम छुट्याएको हौं, केही समयपछि यसलाई बढाउने छौं’ उनले थपे, ‘यो अभियान शुक्रबारदेखि लागु हुनेछ ।’
साथै प्रालिले रात्रीसेवामा सामान हराउने समस्यालाई समाधान गर्न स्टिकर टाँस्ने तयारी गरेको अध्यक्ष सापकोटाले जानकारी दिए ।
उक्त विशेष कार्यक्रममा बोल्दै उद्योग, पर्यटन, वन तथा वातावरण मन्त्रालयका सचिव कृष्णप्रसाद आचार्यले पर्यटन प्रवद्र्धनमा नीजि क्षेत्र सक्रियता बढि हुनुपर्ने बताए । ‘पर्यटन प्रवद्र्धनमा नीजि क्षेत्र सक्रिय हुनुपर्छ’ सचिव आचार्यले भने, ‘सक्रिय हुने वातावरण सरकारले बनाउनुपर्छ ।’
सचिव आचार्यले पर्यटन प्रवद्र्धनका लागि मन्त्रालयले १० वर्षिय गुरुयोजना निर्माण गर्न लागेको जानकारी दिए । उनले पाँच वर्षमा १० अर्व रकम खर्च गर्ने योजनाका साथ मन्त्रालय अघि बढ्ने जानकारी दिए ।
