कर्णालीमा पर्यटन र संस्कृतिको कमी छैन : उपराष्ट्रपति पुन

सुर्खेत । कर्णाली प्रदेशमा पर्यटन र संस्कृतिका हिसाबले कहिकतै कमी नभएको उपराष्ट्रपति नन्द बहादुर पुनले बताएका छन् । प्रदेश राजधानी सुर्खेतको वीरेन्द्रनगरमा मंगलबारदेखि सुरु भएको दोस्रो कर्णाली एक्स्पोको उद्घाटन गर्न आएका उपराष्ट्रपति पुनले आफुले कर्णालीका सबै पर्यटकीय स्थलको भ्रमण गरेको भन्दै यहाँ पर्यटन र संस्कृतिमा कुनै कमी नभएको बताएका हुन् ।

‘हाम्रो देशको विविधता कुनै पुस्तकको पानामा पूर्ण रुपमा पाइदैन त्यसैले यसका लागि पनि नेपाल भ्रमण गर्नु आवश्यक छ ।’ उपराष्ट्रपति पुनले भने, ‘विदेश भ्रमण गर्नु पूर्व आफ्नै देशको भ्रमण गर्न सबै नेपालीलाई अपिल गर्दछु ।’
उपराष्ट्रपति पुनले समृद्ध कर्णाली, सुखी कर्णालीबासी हुन नसके समृद्ध नेपाल, सुखी नेपालीको सपना साकार हुन नसक्ने बताए । भौगोलित र आर्थिक रुपमा कठिन कर्णाली प्रदेश विगतदेखि सरको उपेक्षामा पर्दै आएकोमा संघिय सरकारले राहत स्वरुप कर्णालीलाई प्राथमिकतामा राख्न सरकारको ध्यानाकर्षण गराए ।
‘कर्णाली प्रदेशमा देखिएको कर्मचारी समस्याको दिर्घकालिन समाधान गरिनुपर्दछ । यहाँ दक्ष कर्मचारी आउन सक्ने स्थिति सरकारले सिर्जना गर्नुपर्छ ।’ उपराष्ट्रपति पुनले भने, ‘कर्मचारीले पनि जनताको सेवा गर्न भौगोलिक विकटता लगायतका समस्यालाई विर्सेर यहाँका जनताको सेवाको लागि सकारात्मक हुनुपर्छ ।’
यस्तै महोत्सव उद्घाटन कार्यक्रममा कर्णाली प्रदेशका मुख्यमन्त्री महेन्द्र बहादुर शाहीले जनताको चाहना असल सुशासन भएको भन्दै यसका लागि प्रदेश सरकार अहोरात्र लागिरहेको बताए । कार्यक्रममा बोल्दै मुख्यमन्त्री शाहीले समृद्ध देश निर्माणका लागि उपलब्ध स्रोत साधनको सही सदुपयोग गर्ने योजनाका साथ तीन वटै तह (संघ, प्रदेश र स्थानीय तह)का सरकार लागिरहेको बताए ।

कर्णाली प्रदेशको विकास गर्न सोचेजस्तो सजिलो नभएको बताउँदै मुख्यमन्त्री शाहीले राष्ट्रिय तथा अन्र्तराष्ट्रिय सहयोग नलिदासम्म भौतिक विकास गर्न नसकिने बताए । ‘कर्णाली प्रदेशमा लगानी गर्नेहरुका लागि ५ वर्षसम्म कर छुट गर्ने निर्णय प्रदेश सरकारले गरेको छ ।’ मुख्मन्त्री शाहीले भने, ‘यहाँ अर्गानिक कृषि उत्पादन, पानी, हाइड्रो, पर्यटन लगायतको थुप्रै क्षेत्रमा सम्भावनाको खानी छ ।’ उनले थपे, ‘यसका लागि निजी क्षेत्रको लगानी अपरिहार्य छ ।’
एक्स्पोको उद्घाटन कार्यक्रममा स्थानीय झाँकी प्रदर्शन गरिएको थियो । फागुन १७ गतेसम्म सञ्चालन हुने एक्स्पोमा बुधबार लोक गायक विष्णु खत्री, आधुनिक लोक पप गायक हेमन्त शर्मा, लोकदोहोरी गायिका सम्झना भण्डारी, लोक तथा दोहोरी गायक राजु केसी र पप मोडेल मौसमी रानाको बेजोड प्रस्तुती रहने आयोजकले जनाएको छ ।