मन्त्रालयको वेवसाइटमा छैन प्रदेशका लागि निर्मित पर्यटन वर्षको लोगो

सुर्खेत । कर्णाली प्रदेश सरकारको उद्योग पर्यटन वन तथा वातावरण मन्त्रालयले ‘भिजिट नेपाल २०२०’ का लागि निर्माण गरेको लोगो वेवसाइटमा राख्न सकेको छैन । कर्णाली प्रदेशमा रहेका पर्यटकीय स्थलहरुको फोटो संकलन गर्न नसकेको मन्त्रालयले हालसम्म निर्माण भइसकेको लोगो समेत आफ्नो वेवसाइटमा राख्न नसकेको हो ।

तर वेवसाइटको ग्यालरीमा उपराष्ट्रपति, मुख्यमन्त्री, प्रदेश सरकारका मन्त्रीहरु कार्यक्रममा सहभागी भएका ६ वटा तस्वीर र मन्त्रालय भवनको तस्वीर मात्र राखेको छ ।
मन्त्रालयले कर्णाली प्रदेशका लागि ‘भिजिट नेपाल २०२०’ को छुट्टै लोगो निर्माण गर्न प्रतिस्पर्धा गराएको थियो । प्रतिस्पर्धाबाट उत्कृष्ट बनेको लोगो वापत ४० हजार नगद पुरस्कारको व्यवस्था गरेको थियो । निर्माण भएका लोगोमध्ये उत्कृष्ट लोगोको रुपमा गणेश आचार्यले बनाएको लोगो छनौट भएको थियो ।
मन्त्रालयले नेपाल भ्रमण वर्ष २०२० लाई सफल बनाउनका लागि कर्णाली प्रदेशका पर्यटकिय गन्तव्य, संस्कृतिहरुको पहिचान, प्रचार प्रसार गर्न प्रदेशको पर्यटकिय क्षेत्रको विकासका लागि प्रदेशको पहिचान दिन सक्ने भन्दै प्रतिस्पर्धा मार्फत छनौट गर्ने निर्णय गरेको हो ।
मन्त्रालयको पर्यटन शाखाले लोगो वेवसाइटमा राख्नको लागि सूचना प्रविधि शाखामा नदिएको मन्त्रालयका सूचना प्रविधि शाखाका तुलसी आचार्यले जानकारी दिए ।
पर्यटन शाखाका अन्जु चौधरीले लोगो वेवसाइटमा राख्न मन्त्रालयका सचिवले निर्देशन नदिएको बताएकी छिन् । उनले भनिन्, ‘प्रदेश सचिवको निर्देशन बिना लोगो वेवसाइटमा कसरी राख्नु ।’
प्रदेश सरकारले यसअघि ‘रारा–कर्णाली पर्यटन वर्ष २०७५’ मनाएको थियो । तर मन्त्रालयले यो अवधिमा कति आन्तरिक तथा बाह्य पर्यटक भित्रिए भन्ने एकिन तथ्यांक सार्वजनिक गर्न सकेको छैन ।
मन्त्रालयका प्रदेश सचिव धिरेन्द्रकुमार प्रधानले नेपाल सरकारको निर्णयलाई कार्यान्वयन गर्नुपर्ने भएकोले लोगो वेवसाइटमा राख्न ढिलाई भएको बताए । ‘भिजिट नेपाल २०२० को लोगो सरकारी निकायका सबै स्थानमा राख्नुपर्ने नेपाल सरकारले निर्णय गरि पठाएको छ ।’ उनले भने, ‘उक्त निर्णय कार्यान्वयन गर्नुपर्ने भएकोले ढिलाई भएको हो ।’ उनले थपे, ‘म ४/५ दिन बिदामा भएकोले पनि ढिलाई भएको हो, अब केही दिनमै वेवसाइटमा राख्छौं ।’

मन्त्रालयकाे वेवसाइट हेर्नुहाेस् : http://moitfe.karnali.gov.np/