सुर्खेत । ऋति फाउण्डेशनको आयोजनामा कर्णाली उत्सव, कुडा कर्णालीका हुने भएको छ । यही आउँदो फागुनको दोस्रो हप्तामा सुर्खेतको पर्यटकीय स्थल बुलबुले उद्यानमा कुडा कर्णालीका कार्यक्रम हुन लागेको आयोजकले जनाएका छन् । कार्यक्रमको बारेमा जानकारी दिने उद्देश्यले आयोजित पत्रकार सम्मेलनमा आयोजक समितिका सदस्य केवल भण्डारीले भन्नुभयो, ‘कर्णालीलाई मुलुक भित्र र बाहिर चिनाउनका लागि कर्णाली उत्सव गर्न लागिएको हो ।’ समग्र विषयवस्तु माथि छलफल हुने कार्यक्रम भएकोले यसलाई उत्सवकै रुपमा आयोजना गरिएको बताउँदै भण्डारीले भन्नुभयो, ‘कर्णालीका कठिनाईका विषयमा छलफल हुनेछ भने यस कार्यक्रमले कर्णालीलाई फरक मूल्यको सिर्जना गर्नेछ ।’
भण्डारीका अनुसार तीनसम्म संचालन हुने उक्त कार्यक्रम पहिलो दिन वीरेन्द्रनगर बजार परिक्रम पश्चात देउडाबाट कार्यक्रमको औपचारिक उद्घाटन हुनेछ भने कर्णालीका बेला (समय), शासनका तीन तह, सँगसँगै हिन र खसका खासखुसको सेसन रहेको छ भने साँझ कर्णालीका विभिन्न नृत्यहरु ( थारु, भोटे, मयुर नाच) प्रस्तुत गर्ने कार्यक्रम रहेको छ ।
यसैगरि दोस्रो दिन कर्णाली कोट्याउ, कालापहाडका तोणा, कर्णाली क्या नाम घुमेर हेर्दा, कर्णालीका कला, दबाई र देउता– भोक र भकारीलगायतका सेसनमा छलफल हुनेछ भने साँझ कविता वाचन कार्यक्रम रहनेछ ।
तेस्रो दिनमा मान्ठा जुर्मराउँछन्, कसरी बन्छ कर्णाली, साहित्यमा कर्णालीका कथा, कर्णालीको एघारौं जिल्ला (राउटे) र साँझ गजल वाचनको कार्यक्रम रहने बताइएको छ । कर्णाली प्रदेशमा १० वटा मात्र जिल्ला रहेका छन् भने लोपोन्मुख जाती राउटेलाई एउटा जिल्लाको रुपमा विश्लेषण गरिने बताइएको छ ।
विभिन्न सरोकारका विषयमा अध्ययन र अनुसन्धान गर्नेहरुदेखि यहाँका स्थानीय कुरालाई राष्ट्रियस्तरसम्म पु¥याउनका लागि यो कार्यक्रम सार्थक हुने आयोजक समिति सदस्य रेशम विष्टले बताउनु भयो । कर्णालीका कला, साहित्य, संस्कृति, शिक्षा राजनीतिसँग सम्बन्धित विषयवस्तुलाई छलफल गर्ने कार्यक्रम रहेकोले कर्णालीलाई बुझेका व्यक्तिहरुको प्रस्तुतिकरणले यहाँको राजनैतिक, सामाजिक, आर्थिक अवस्थाका बारेमा विचार विमर्श हुने विष्टको भनाई थियो ।
पत्रकार सम्मेलनमा बोल्दै आयोजक समितिका संयोजक दिनेश गौतमले भन्नुभयो, ‘खसको विरासतलाई बाहिर देखाउनका लागि यो कार्यक्रम प्रभावकारी हुने कुरामा विश्वस्त छौं ।’ कर्णालीका स्थानीय, कर्णालीका तर कर्णाली बाहिर बसेका र कर्णालीलाई चिनेका अन्य प्रदेशका गरि तीन तहका वक्ताहरुको संगमस्थलको रुपमा यो कार्यक्रम गर्न लागिएको बताएइको छ । करिब ३५ लाख खर्च लाग्ने अनुमान गरिएको यो कार्यक्रमलाई विभिन्न सरकारी तथा गैरसरकारी संस्थाहरुले प्रयोजन गर्नेछन् ।
