आठवीस नगरपालिकामा तालाबन्दी गर्ने चेतावनी सहित ज्ञापन पत्र

दैलेख (अाठवीस) ।  नेपाली काँग्रेस आठवीस नगर कार्यसमितिले नगरपालिका कार्यालयमा तालाबन्दी गर्ने चेतावनी सहित ज्ञापन पत्र बुझाएको छ । नगरप्रमुख खड्गराज उपाध्याय समक्ष आगामी माघ ३ गतेसम्मको समय दिदैं उक्त समयमा माग पुरा नगरे नगरपालिकामा तालाबन्दी गरिने भन्दै ज्ञापन पत्र बुझाएको हो ।
यस अघि काँग्रेस आवबीस नगरपालिकाले राखेका विभिन्न मागहरु पुरा गर्न निर्वाचित जनप्रतिनिधी, त्यहाँस्थित राजनीतिक दलका प्रतिनिधीहरु बसी गत भाद्र २६ गते १० बुदे लिखित सहमति भएको थियो । उक्त सहमति अनुसार नगरपालिकाले कामकार्वाही अगाडी नबढाएकोले तालाबन्दी गर्ने चेतावनी सहित ज्ञापन पत्र बुझाएको नगर सभापति अर्जुन बहादुर शाहीले जानकारी दिए ।
उनले भने, ‘हामीले बारम्बार नगरको ध्यानाकर्षण गराउँदा समेत नगर प्रमुखले कुनै सुनुवाई गरेनन् ।’

यस्तो थियो १० बुँदे सहमती

१. आठवीस नगरपालिका वडा नं. ७ को चौरेटा र वडा नं. ८ को उकाली मोडमा बालविकास केन्द्रको कोटा स्थापना सहित व्यवस्थापन गर्ने ।
२. आठवीस नगरपालिकाको आर्थिक तथा अन्य विभिन्न विवादित विषयमा छानविन गरी तपसिल बमोजिमको ५ सदस्यी छानविन समिति गठन गरी उक्त समितिले प्रतिवेदन तयार गरी नगर कार्यपालिकाको बैठकमा पेश गर्ने ।
मुक्ति प्रसाद उपाध्याय – संयोजक
डबल सुनार – सदस्य
प्रयाग बहादुर शाही – सदस्य
पूर्ण प्रसाद खनाल – सदस्य
दिलबहादुर शाही – सदस्य (सचिव)
३.पुर्ननिर्माण प्राधिकरणबाट आएका प्राविधिक मदनबहादुर शाहीलाई नगरपालिकाको कार्यालयमा हाजिर गराउने ।
४. पाँचौं नगरसभाले पास गरेको बजेट तथा योजना मध्य (युवा रोजगार, महिला) शिर्षकबाट कार्यपालिकाको बैठकमा वडा नं. २,६,७,५ र ८ मा बजेट संशोधन गर्ने ।
५. विगत देखि कार्यरत कर्मचारी व्यवस्थापनका लागि नगरपालिकाको राजश्वको आम्दानी शिर्षकको पहिचान गरी साविकका गाविसले नियुक्ति गर्ने गरेका कर्मचारीलाई व्यवस्थापन गर्ने ।
६. स्थानीय सरकार संचालन कार्यविधि ऐन अनुसार सार्वजनिक सुनुवाई अनिवार्य गर्ने ।
७. उच्च अदालतमा विचाराधिन आठविस नगरपालिकाको मुद्धा तत्काल फिर्ता लिने ।
८. नगरपालिकाको अनुगमन समिति तयार गरी अनुगमन गर्ने गरी समितिको लिस्ट तयार गरी अनुगमन गर्ने गरी समितिको बैठकको सिफारिसको आधारमा भुक्तानी दिने ।
९. वडा कार्यालयबाट प्राथमिकताको आधारमा आएका योजना नगरले बनाउँदा, सम्झौता गर्दा र भुक्तानी गर्दा सम्बन्धित वडा कार्यालयको सिफारिस बिना नगरपालिकाले उक्त कार्य नगर्ने ।
१०. सहमतिका माथि उल्लेखित ९ वटा बुदा दुवै पक्षले अक्षरंस पालना गर्ने तथा मिति २०७६ श्रावण ३ गते नगरपालिकामा बुझाइएका छाप फिर्ता गर्ने ।