सुर्खेत । बाँकेको कोहलपुर नगरपालिका–६ स्थित आफन्तको घरमा बास बसेका पूर्व मन्त्री तप्तबहादुर विष्टसहितका नेताहरुमाथि नेकपाका कार्यकर्ताले आक्रमण प्रयास गरेका छन् । काठमाडौंबाट सुर्खेत आउँदै गरेका पूर्व सूचना तथा सञ्चार राज्यमन्त्री तप्तबहादुर विष्ट, पञ्चपुरी नगरपालिकाका प्रमुख उपेन्द्रबहादुर थापा बुधबार राति कोहलपुर नगरपालिका–६ स्थित मोहन गाहाको घरमा बास बस्न गएका थिए ।
दिउँसोको हवाई जहाज डिले भएर बेलुकी साढे पाँच बजे राँझा विमानस्थल पुगेका पूर्व सञ्चार राज्यमन्त्री विष्ट, पञ्चपुरी नगरपालिकाका मेयर थापासहितको टोली गाहाको घरमा बास बस्न गएको थियो । ‘घरभित्र पस्ने वित्तिकै नेकपाका कार्यकर्ताले आक्रमणको प्रयास गरे,’ मेयर थापाले भने, ‘आफन्तको घरमा बास बस्न पनि नपाइने भयो ।’ कोहलपुर–६ मा वडा अध्यक्षका लागि निर्वाचन हुँदैछ ।
गाहा सुर्खेतको गुर्भाकोट नगरपालिका–१४ का स्थायी बासिन्दा हुन् । ‘राति परेकाले आफन्तको घरमा बास बस्न आएका थियौं, चुनाव प्रचार गर्ने हाम्रो कुनै उद्देश्य थिएन्,’ मेयर थापाले भने, ‘घरभित्र पस्ने वित्तिकै नेकपाका कार्यकर्ताले आक्रमणको प्रयास गरे ।’ घटनाले उग्ररुप लिएपछि इलाका प्रहरी कार्यालय कोहलपुरबाट प्रहरी नायव उपरीक्षक (डिएसपी) हेमबहादुर शाहीको कमाण्डमा गएको प्रहरी टोलीले पञ्चपुरी नगरपालिकाको सवारी साधन नियन्त्रणमा लिएको छ ।
‘दिउँसो उड्नु पर्ने प्लेन राति उडेकाले पञ्चपुरीमा पुग्ने अवस्था रहेन्,’ मेयर थापाले भने, ‘त्यसैले आफन्तकोमा बास बस्न आएका थियौं, नेकपाका कार्यकर्ताले आफन्तकै घरमा आएर आक्रमण प्रयास गरे ।’ उनले नेकपाका कार्यकर्ता र प्रहरीले आफूहरुलाई अनावश्यक दुःख दिएको बताए ।
