सुपुर्दगी गरे आत्महत्या गर्छु : निरव मोदी

 

लन्डन (बेलायत) । भारतीय हिरा व्यापारी निरव मोदीले आफूलाई भारत सुपुर्दगी गरिए आत्महत्या गर्ने चेतावनी दिएका छन् ।

अदालतमा पेश हुने क्रममा बुधवार उनले त्यस्तो चेतावनी दिएका हुन् । उनीमाथि भारतको सरकारी बैंक पञ्जाब नेशनल बैंक (पीएनबी)को २ अर्ब डलर हेरफेर गरेको आरोप लागेको छ ।

उनी अहिले बेलायतको जेलमा छन् । मोदीले चौंथो पटक दिएको जमानत अनुरोधबारे फैसला गर्न वेष्टमिनिष्टर म्याजिष्ट्रेट्स अदालतका प्रमुख न्यायाधीश एम्मा आर्बुथनोट सामु पेश गरिएको थियो ।

यस क्रममा उनलाई जेलमा ‘तीन पटक’ पिटिएको बताइएको छ । आफूलाई भारत सुपुर्दगी गरिएमा आत्महत्या गर्ने धम्की पनि मोदीले दिएका छन् । भारतमा आफूमाथि निष्पक्ष सुनुवाई नहुने दाबी मोदीको छ ।

तर जेलबाहिर भए मोदी फरार हुने वा प्रमाण तथा प्रत्यक्षदर्शीहरुलाई प्रभावित बनाउन सक्ने भन्दै आर्बुथनोटले उनको जमानत अस्वीकार गरेकी छिन् ।

अप्रिलमा उनीमाथि दुई पटक सांघातिक आक्रमण भएको मोदीका वकिल ह्यूगो किथले बताएका छन् । गत मंगलवार पनि उनीमाथि कुटपिट भएको बताइएको छ ।

कारागार प्रशासनले उनीमाथि भएको आक्रमण रोक्न असफल भएको किथको भनाइ छ । मोदीले राखेको काउन्सलरको माग पनि अस्वीकार गरिएको आरोप छ ।

मिडियाले मोदीलाई ‘अर्बपति हिरा कारोबारी बताइरहेकाले उनीमाथि भविष्यमा पनि आक्रमण हुन सक्ने चिन्ता किथले व्यक्त गरेका छन् । डिसेम्बर ४ मा भिडियोलिंक मार्फत मोदीलाई अदालतमा प्रस्तुत गरिनेछ ।

सन् २०२० को मे ११ देखि १५ मा मोदीलाई भारत सुपुर्दगी गर्ने नगर्ने बारेमा बहस शुरु हुँदैछ, त्यसअघि उनलाई हिरासतमा राखिनेछ । रासस/पीटीआई