बझाङ । बझाङको बुङगल नगरपालिका–१ स्थित कालंगा हाइड्रोको काम गर्ने क्रममा सुरुङ भत्किँदा त्यसभित्र फँसेका चार मजदुर मृत अवस्थामा फेला परेका छन् । मृत फेला पर्नेमा दैलेख गुराँस गाउँपालिका–३ का कर्णबहादुर शाही, सोही ठाउँका महेन्द्रबहादुर शाही, अछामका अछाम तुर्माखाद–६ महेन्द्र साउद र बझाङ बुङ्गल नगरपालिका– १ का शेरसिंह धामी रहेका छन् ।
काठमाडौंबाट हेलिकप्टरमा गएको नेपाली सेनाको टोलीले अहिले शव बाहिर निकाल्ने प्रयास गरिरहेको छ । बझाङका डीएसपी गणेशबहादुर बमका अनुसार मृतकहरु सुरुङको १३ सय मिटर भित्र भेटिएका हुन् । सेनाको नौ सदस्यीय टोली उद्धारका लागि सुरुङभित्र छिरेको छ ।
आइतबार दिउँसो करिब ३ बजे सुरुङभित्र ७ जना छिरेका थिए । तीमध्ये तीनजना शास फेर्न गाह्रो भएको भन्दै तत्कालै बाहिर निस्केका थिए । सुरुङभित्र छिरेका ४ जना झण्डै २५ घण्टापछि मृत अवस्थामा भेटिएका हुन् ।
बझाङको बुङ्गल नगरपालिका–१ स्थित कालंगा हाइड्रोको काम गर्ने क्रममा सुरुङ भत्किँदा त्यसभित्र फसेका चार जना मजदुरको उद्धारमा समस्या भएको छ । कुरिनटारबाट नेपाली सेनाको हेलिकोप्टर ग्यास र उद्धार टोलीसहित कालंगा पुगेको थियो ।
केही पर पुगेपछि दुई जना ट्याक्टरबाट ओलिएर हिँड्दै ग्यासको पाइप चेक गर्न थाले भने चालक दिलबहादुर थापामगरसहित चार जना ट्याक्टरमा भित्र छिरे ।
त्यसपछि चारजना ट्याक्टरबाट ओर्लिएर लाइट र पाइपहरु चेक गर्न थाले । उनीहरु १८ सय मिटर लामो सुरुङको एक किलोमिटर भित्र थिए ।
ट्याक्टर चालक मगर भने अन्य दुई जनालाई लिन फर्किए । सुरुङभित्र अक्सिजन ग्यास सकिएकाले सास फेर्न गाह्रो भएपछि चालक मगर बाहिर निस्कन खोजे । तर, त्यतिबेलासम्म चार जना बेहोस भएर अगाडि ढलिसकेका थिए । त्यसपछि चालक मगर अरु दुई जनालाई लिएर बाहिर निस्किए र बाहिर निस्किएपछि उनी पनि बेहोस भए । स्वास्थ्य अवस्था सामान्य हुँदै गएपछि आइतबार बेलुका उनले घटनाबारे बोलेका हुन् ।
चालक मगरको अहिले पनि स्थानीय स्वास्थ्य चौकीमा उपचार भइरहेको छ । चारजना करिब १ किलोमिटरको दुरीमा रहेको र सेना र प्रहरीको टोली ७ सय मिटरभन्दा भित्र पस्न नसकेको जिल्ला प्रहरी कार्यालय बझाङका प्रमुख, डीएसपी गणेशबहादुर बमले जानकारी दिए ।
सात सय मिटरभन्दा अगाडि छिर्न नसकिने भएकाले एक किलो मिटर भित्र रहेका चार जना जीवितै भेटिने सम्भावना कम रहेको डीएसपी बमले बताए ।
नेपाल प्रहरी, शसस्त्र प्रहरी, नेपाली सेना र स्थानीयवासीले उद्धारको प्रयास गरेका थिए । ७५ मेगावाट क्षमताको कालंगा हाइड्रोको उक्त सुरुङ करिब १६ सय मिटर लामो छ ।
